د خیبر پښتونخوا د سویلي وزیرستان د سروکۍ او بروند سیمو اوسېدونکو د مخابراتي او انټرنېټي خدمتونو د بندیز لړۍ د دوام پرضد پراخ لاریون کړی او له چارواکو یې غوښتي، چې ژر تر ژره د دوی لپاره مخابراتي او انټرنېټي خدمتونه بېرته فعال کړي.
په دغه لاریون کې د سیمې ګڼ شمېر قبایلي مشرانو، ځوانانو، ټولنیزو فعالانو او سوداګرو ګډون کړی و. دوی وویل، چې له تېرو لسو ورځو راهیسې د مخابراتي او انټرنېټي خدمتونو بندښت د خلکو ورځنی ژوند زیانمن کړی او بنسټیز خدمتونه یې په ټپه درولي دي.
لاریون کوونکو وویل، چې په اوسنۍ پرمختللې نړۍ کې د اړیکو اسانتیاوې د ژوند بنسټیزه اړتیا ګرځېدلې؛ خو د وزیرستان خلک بیا له دغه حق نه بېبرخې کېږي. دوی زیاته کړه، چې د اختر په ورځو کې زرګونه خلک له خپلو کورنیو سره د اړیکو نیولو توان نهلري؛ نه د هېواد دننه او نه بهر.
د دوی په وینا؛ د مخابراتي او انټرنېټي خدمتونو بندښت د زدهکوونکو زدهکړې، د سوداګرو کاروبارونه، انلاین بانکي چارې او رسمي اړیکې سختې اغېزمنې کړې دي. ناروغان او د بېړنیو مرستو اړمن کسان هم له جدي ستونزو سره مخ دي، ځکه له روغتونونو او ژغورنې ادارو سره اړیکه نهشي نیولی. د سیمې د معلوماتو له مخې؛ د سرا روغې احمدوام په مخابراتي ستنو کې تخنیکي ستونزه رامنځته شوې، چې د سیمې درې مخابراتي ستنې له همدې مرکز سره تړلې دي او د همدې خرابۍ له امله ټولې شبکې او انټرنېټ ګډوډ شوی دی.
ټولنیز فعال جمال ملیار محسود ویلي، د وزیرستان خلک د هېواد برابر وګړي دي او باید ورته هماغه بنسټیز خدمتونه برابر شي چې د هېواد په نورو برخو کې دي. هغه زیاته کړه، چې د اړیکو پرلهپسې بندښت له بنسټیزو حقونو سرغړونه ده او د زدهکوونکو، ناروغانو، سوداګرو او عامو خلکو ژوند یې له سختو ستونزو سره مخ کړی دی.
لاریون کوونکو له حکومتي چارواکو، مخابراتي شرکتونو او ولسي استازو غوښتي، چې ژر تر ژره دې د ستونزې حل ته جدي پاملرنه وکړي او مخابراتي او انټرنېټي خدمتونه دې بېرته فعال کړي.
