کورنۍ لوبې؛ په بغلان کې د څلورو ولایتونو د لوبغاړو په ګډون د رزمي لوبو سیالۍ ترسره شوې
په بغلان کې د رزمي لوبو سیالۍ ترسره شوې، چې د افغانستان له څلورو ولایتونو ۸۰ لوبغاړو پهکې برخه اخیستې وه. په دغه سیالیو کې د کابل، بلخ، بدخشان او بغلان ولایتونو لوبغاړو برخه اخیستې وه او د بغلان ولایت په مرکز کې یې د یوې ورځې لپاره د یو بل په وړاندې سیالي وکړه.
د دغه سیالیو په پای کې د بغلان ولایت لوبډلې د لوړو نمرو په لرلو لومړی مقام ترلاسه کړ. د کابل لوبډلې دویم مقام خپل کړ او د بدخشان ولایت لوبغاړو وکولای شوای، چې په دغه سیالیو کې درېیم مقام وګټي.
د سیالیو تنظیموونکو ویلي دي، چې د دغه سیالیو د ترسره کولو موخه د هېواد د بېلابېلو ولایتونو د لوبغاړو ترمنځ د رزمي لوبو، په ځانګړې توګه د «توان» لوبو په برخه کې وده او پراختیا وه.
