د اسراییل پوځ: په تېرو ۲۴ ساعتونو کې مو د حزبالله له ۱۳۵ څخه ډېر هدفونه په نښه کړي دي
د اسراییل پوځ د پنجشنبې په ورځ اعلان وکړ، چې په تېرو ۲۴ ساعتونو کې یې د لبنان په صور، بقاع او سویلي سیمو کې د حزبالله له ۱۳۵ څخه ډېر هدفونه له منځه وړي دي.
د اسراییل د پوځ د معلوماتو لهمخې، په دغو بریدونو کې د راکټ توغولو شاوخوا ۱۰ هغه ځایونه په نښه شوي، چې حزبالله ترې د اسراییلي پوځیانو او ملکي وګړو پر وړاندې کار اخیست. د اسراییل پوځ همداراز ویلي، دغه د توغندیو اډې د بقاع او د سویلي لبنان په اړوندو سیمو کې هدف ګرځول شوې دي.
د اسراییل پوځ زیاته کړې، چې د بقاع په «بریتال» سیمه کې یې د حزبالله ډلې یو لوی روزنیز کمپ هم تر سختو هوايي بریدونو لاندې راوستی او زیانمن کړی دی. د اسراییل پوځ د خبرپاڼې پر بنسټ، اسراییلي ځواکونو تېره شپه د لبنان په ساحلي ښار «صور» کې د حزبالله شاوخوا ۱۵ پوځي تاسیسات او بنسټونه هم په نښه کړي، چې د دوی په وینا یادې ډلې ترې د خپلو عملیاتو او بریدونو د پرمخ بېولو لپاره استفاده کوله.
په ورته مهال د اسراییل هوايي ځواک ادعا کړې، چې د حزبالله یو شمېر وسله وال یې هم په هغو شیبو کې هدف ګرځولي او وژلي دي، چې د راکټ توغولو له یوه کارول شوي ځای څخه د وتلو او تېښتې په حال کې وو. د حزبالله ډلې تر اوسه پورې د اسراییل د پوځ د دغو ادعاوو او بریدونو په اړه په رسمي ډول څه نه دي ویلي.
