د ملګرو ملتونو د بشري مرستو د همغږۍ دفتر (اوچا) د افغانستان څانګې مشرې اېمي مارټین ننګرهار ولایت ته د سفر پرمهال ویلي، د وروستیو سېلابونو له امله زیانمنې شوې کورنۍ لاهم له سختو بشري ستونزو سره مخ دي او دوامداره ملاتړ ته اړتیا لري.
هغې ویلي، په وروستیو اوونیو کې د ننګرهار په ۸ ولسوالیو کې سېلابونو هغه کورنۍ سختې اغېزمنې کړې چې د سیند غاړې ته یې لنډمهاله استوګنځایونه جوړ کړي وو؛ د سېلابونو له امله دغه خلک یو ځل بیا بېځایه شوي دي.
د اوچا د معلوماتو له مخې؛ مرستندویه بنسټونو اغېزمن شویو کورنیو ته خېمې، خوراکي توکي، نغدي مرستې او نور د اړتیا وړ وسایل وېشلي؛ خو لا هم وضعیت پېچلی دی. اېمي مارټین ویلي، ځینې کورنۍ نهشي کولای خپلو پخوانیو سیمو ته ستنې شي؛ ځکه د سیند غاړې د دایمي اوسېدو لپاره خوندي نهدي او دوی شخصي ځمکې هم نهلري.
نوموړې زیاته کړه، هغه کورنۍ چې بېرته ستنېږي د خپلو کورونو د بیارغونې او ترمیم لپاره منځمهاله او اوږدمهاله مرستو ته اړتیا لري. د اوچا مشرې د بودجې کمښت د بشري مرستو ستره ستونزه بللې او ویلي یې دي، چې تر اوسه یوازې ۱۴ سلنه اړینې مالي سرچینې برابرې شوې دي.
هغې خبرداری ورکړی، د واورو وېلې کېدو له پیلېدو سره د نورو سېلابونو ګواښ هم شته چې ښايي د خلکو وضعیت نور هم کړکېچن کړي. اوچا ویلي، افغانستان د اقلیمي بدلونونو پر وړاندې تر ټولو ډېر زیانمنونکی هېواد دی.
د یادې ادارې په وینا؛ همدغه سیمه نهه میاشتې وړاندې د زلزلې له امله هم زیانمنه شوې وه او ډېرې بېځایه شوې کورنۍ لا هم دایمي حللارې ته نهدي رسېدلې. اېمي مارټین له نړۍوالې ټولنې غوښتي، چې نه یوازې د بېړنیو بشري اړتیاوو لپاره بلکې د خلکو د خوندي او دایمي استوګنځایونو برابرولو لپاره هم پراخ ملاتړ وکړي.
