د اسراییل لومړی وزیر بنیامین نتنیاهو ویلي، د جګړې په پیل کې یې اعلان کړی و چې د منځني ختیځ بڼه به بدله کړي او له پیله روښانه وه چې د حـ. ـماس او حـ. ـزبالله ډلو تر شا د ایران اسلامي جمهوریت ولاړ دی.
هغه زیاته کړه چې هره ورځ له ټرمپ سره خبرې کوي او په ایران کې یې لا هم کار بشپړ شوی نه دی. د هغه په وینا، د اټومي ګواښ د شنډولو ترڅنګ باید د بېپیلوټه الوتکو یا ډرونونو ګواښ هم مهار شي.
د امریکا د خزانې وزیر، سکاټ بسنټ، خبرداری ورکړی چې واشنګټن به هر هغه لوری په سختۍ په نښه کړي چې د هُرمز تنګي کې د محصول د اخیستو په بهیر کې رول ولري.
بسنټ په اېکس خواله رسنۍ کې لیکلي چې عمان باید په دې پوه شي چې د امریکا حکومت به د هُرمز تنګي لپاره د محصول ټولولو د نظام د پلي کولو هېڅ ډول هڅه ونه زغمي.
هغه ویلي: «د امریکا د خزانې وزارت به په تهاجمي ډول هر هغه شخص یا بنسټ هدف وګرځوي چې په مستقیم یا غیر مستقیم ډول د هرمز تنګي د محصول په راټولولو کې مرسته کوي، او هر شریک چې دې کار ته لېواله وي، هغه به هم مجازات شي.»
د امریکا د خزانې وزیر زیاته کړې چې ټول هېوادونه باید د ایران هغه هڅې په کلکه رد کړي چې د نړیوالې سوداګرۍ ازاد بهیر ګډوډوي.
بسنت ویلي: «د تهران له لوري د سیمې او نړۍ د وېرولو دوره پای ته رسېدلې ده.»
د هرمز تنګی د نړۍ له مهمو سمندري لارو څخه ګڼل کېږي چې د نړیوالې انرژۍ او سوداګرۍ د لېږد یوه ستره برخه ترې تېرېږي. د دې سیمې په اړه هر ډول ترینګلتیا د نړیوالو بازارونو او د انرژۍ پر بیو مستقیم اغېز لرلی شي.
واشنګټن پوسټ ورځپاڼې راپور ورکړی، چې د ډونالډ ټرمپ د ادارې چارواکي د امریکا د تاسیس د ۲۵۰مې کلیزې په مناسبت د نوموړي له انځور سره د ۲۵۰ ډالري بانکنوټ د چاپولو طرحه تعقیبوي، خو د امریکا اوسنی قانون پر بانکنوټ د ژوندیو کسانو د انځورونو چاپول منع کوي.
د واشنګټن پوسټ ورځپاڼې د راپور پر بنسټ، د امریکا د خزانې وزارت ګومارل شویو چارواکو له تېر کال راهیسې په وار وار د دغه وزارت د حکاکۍ او چاپ پر ادارې فشار راوړی ترڅو د ډونالډ ټرمپ له انځور سره د ۲۵۰ ډالري بانکنوټ لومړنۍ نمونه ډیزاین کړي. که دا اقدام عملي شي، دا به په تېرو څه باندې ۱۵۰ کلونو کې لومړی ځل وي چې د یو ژوندي کس انځور د امریکا پر بانکنوټونو باندې راڅرګندېږي.
د باوري سرچینو په وینا، د امریکا خزانهدار برانډن بیچ او د هغه جګپوړي سلاکار مایک براون د تېر کال د اګسټ او سېپټمبر په میاشتو کې ازمایښتي طرحې وړاندې کړې وې، چې په یوه کې یې د ډونالډ ټرمپ انځور د ۲۵۰ ډالري بانکنوټ په منځ کې ښکاري. دغه راز بریتانوي هنرمند ایین الکساندر وایي دا نمونه ده ډیزاین کړې، ټینګار یې کړی چې دا طرحه یې په خپله د امریکا د ولسمشر ډونالډ ټرمپ په همغږۍ او د هغه د نظرونو او فیډبیک له مخې چمتو کړې ده.
بلخوا د امریکا د خزانې وزارت یوه ویاند ویلي، د حکاکۍ او چاپ اداره د قانوني طرحې په ځواب کې اړینه ارزونه ترسره کوي او که دا طرحه په قانون بدله شي، د ۲۵۰ ډالري یادګاري بانکنوټ د تولید لپاره به لاس په کار شي. په همدغه مهال د خزانې وزارت څلورو کارمندانو ویلي، د امریکا د پیسو د چاپ او حکاکۍ ادارې مشره پاټریشیا پېټي سولیمین وروسته له هغې له خپلې دندې ګوښه او په وزارت کې بل پړاو ته واستول شوه چې د دغې طرحې په اړه یې خپل ملاحظات او مخالفتونه څرګند کړل. هغې خبرداری ورکړی و چې پهدې لاره کې جدي حقوقي او تخنیکي خنډونه شتون لري او د داسې بانکنوټ ډیزاین کول ښايي کلونه وخت ونیسي. هممهاله ویل کېږي چې د ډونالډ ټرمپ له لاسلیک سره د ۱۰۰ ډالري نوو بانکنوټونو د چاپ کار هم روان دی.
کارپوهان پهدې باور دي چې د کانګرس له تصویب پرته د ۲۵۰ ډالري بانکنوټونو چاپول ممکن نه دي؛ ځکه دا کار د قانوني محدودیتونو ترڅنګ، له مالي او امنیتي بنسټونو سره پراخې او جدي همغږۍ ته اړتیا لري.
د چین د دفاع وزارت ویاند ویلي، چې د دغه هېواد او پاکستان د ځمکنیو، سمندري او هوايي ځواکونو ترمنځ د پوځي تمرینونو لړۍ د دوه اړخیزو دفاعي همکاریو په څرګند او بریالیو پروژو بدل شوي او دواړه هېوادونه د پوځي همکاریو پیاوړتیا ته ژمن دي.
د چین د دفاع وزارت ویاند ډګروال جیانګ بین ویلي، چین او پاکستان د غرونو او سیندونو له لارې تړلي ښه ګاونډیتوب او یو پر بل باور لري.
نوموړي ویلي، چې د دواړو هېوادونو ترمنځ د عملي همکاریو لړۍ د ستراتیژیکو اړیکو، ګډو تمرینونو او روزنې، د پرسونل د تبادلې او د دفاعي تجهیزاتو او ټیکنالوژۍ په برخو کې خورا رغنده پایلې لرلې دي.
د چین د دفاع وزارت ویاند روښانه کړه، د دواړو هېوادونو د ځمکنیو، سمندري او هوايي ځواکونو ترمنځ د پوځي تمرینونو لړۍ چې په کې د «واریئرز»، «اوشین ګارډز» او «ایګلز» ګډ تمرینونه شامل دي، د دوهاړخیزو دفاعي همکاریو په څرګندو او بریالیو پروژو بدل شوي دي. نوموړي وویل، بیجینګ چمتو دی چې له پاکستان سره د ستراتیژیکو لارښوونو لاندې کار وکړي، ترڅو دودیزه ملګرتیا کې پرمختګ وکړي او ستراتیژیکې اړیکې پراخې کړي.
دا په داسې حال کې ده، چې د پاکستان لومړي وزیر شهباز شریف په همدې اونۍ کې چین ته څلور ورځنی رسمي سفر وکړ او د دواړو هېوادونو چارواکو په بېلابېلو برخو کې څو مهم تړونونه هم لاسلیک کړل.
د امریکا د خزانې وزارت اعلان کړی، چې د بندیزونو له تور نوملړه د ۷۶ کسانو، بېړییو او ادارو نومونه لرې کوي.یاد وزارت ویلي چې دا اقدام به د بندیزونو د سرغړونې او تېښتې د مخنیوي لپاره پر پېچلو او لوړ خطر لرونکو هدفونو د لا زیات تمرکز لامل شي.
د امریکا د خزانې وزارت د پنجشنبې په ورځ په یوه اعلامیه کې ویلي، چې یاد نومونه زاړه او کمخطره وو او د هغوی څارنه د شرکتونو او مالي بنسټونو لپاره اضافي لګښتونه او اداري بار رامنځته کاوه.
د وزارت په وینا، ځینو شرکتونو شکایت کړی و چې دوی اړ دي د هغو هدفونو د ارزونې لپاره پراخې سرچینې ولګوي چې یا نور نشته او یا هم ډېر کم خطر لري.
د امریکا د خزانې وزارت ویلي: «موږ د دې بار د کمولو لارې چارې لټو، څو د بندیزونو عملي کول اغېزناک شي او د بندیزونو د تېښتې پر پېچلو او لوړ خطر لرونکو مواردو لا زیات تمرکز وشي».
په وروستیو کلونو کې امریکا پر ایران، روسیې، سوریې او وینزویلا د بندیزونو کارول پراخ کړي دي. د خزانې وزارت د معلوماتو له مخې، د نوو بندیزونو شمېر په ۲۰۱۷ کال کې ۸۸۰ و، خو دا شمېر په ۲۰۲۴ کال کې له ۳۰۰۰ څخه اوښتی دی.
په نړیواله کچه امریکا د بندیزونو له وسیلې د خپلو بهرنیو سیاستونو د پلي کولو لپاره پراخه استفاده کوي، خو منتقدین وایي د بندیزونو د لېستونو پراخوالی د مالي او سوداګریزو بنسټونو لپاره پیچلتیاوې هم زیاتوي.
دپاکستان د بهرنیو چارو وزارت ویلي، چې اسحاق ډار سبا واشنګټن ډي سي ته رسمي سفر کوي او د امریکا د بهرنیو چارو وزیر مارکو روبیو سره په لیدنه کې به سیمې د وضعیت په اړه خبرې وکړي.
د پاکستان د بهرنیو چارو وزارت خبرپاڼه کې راغلي چې اسحاق ډار به په نیویارک کې د ملګرو ملتونو د امنیت شورا او نورو رسمي غونډو تر بشپړېدو وروسته واشنګټن ته ولاړ شي. د معلوماتو له مخې، په دې سفر کې به د پاکستان او امریکا پر دوهاړخیزو اړیکو، سیمهییزو او نړیوالو تحولاتو او د ګډو ګټو پر موضوعاتو خبرې وشي.
خبرپاڼه زیاتوي چې دواړه لوري به په مهمو برخو کې د همکاریو د پیاوړتیا او د خبرو اترو او ډیپلوماسۍ له لارې د سیمهییزې سولې او ثبات د ټینګښت په اړه هم خبرې وکړي.
د پاکستان د بهرنیو چارو وزارت ویلي، دا سفر له امریکا سره د اسلاماباد د اوږدمهالو او پراخو اړیکو د لا ژورولو لپاره د پاکستان ژمنتیا څرګندوي.
ټاکل شوې اسحاق ډار خپلې رسمي لیدنې تر بشپړېدو وروسته په همهغه ورځ بېرته اسلاماباد ته ستون شي. د دې سفر اعلان په داسې حال کې کېږي چې په وروستیو میاشتو کې د واشنګټن او اسلاماباد ترمنځ د اړیکو د بیا فعالېدو هڅې زیاتې شوې دي.