د بلوچستان ایالت عبدالله کلا ولسوالۍ په ګلستان سیمه کې د اختر په ورځ د ځمکې د ملکیت پر سر د دوو کورنیو ترمنځ خونړۍ نښته شوې، چې له امله یې دوه کسان وژل شوي او څلور نور ټپیان دي.
د راپورونو له مخې؛ د سید صداماغا او نور احمد اغا په نومونو د دوو کورنیو ترمنځ د ځمکې پر سر شخړه رامنځته شوې، چې په ترڅ کې د سید صدام اغا ورور دلاور اغا او سید نور احمد اغا ووژل شول.
پولیس وایي، په دې پېښه کې سید صدام اغا او درې نور کسان هم ټپیان شوي، چې د درملنې لپاره د کوټې ښار ته لېږدول شوي دي. دا په داسې حال کې ده، چې په بلوچستان کې له تېرې یوې اوونۍ راهیسې د ځمکې په سر د شخړو له امله لږترلږه اووه کسان وژل شوي دي.
تر دې وړاندې د کوټې ښار د سریاب په سیمه کې هم د یوې کورنۍ پر کور ډزې شوې وې، چې له امله یې د یادې کورنۍ پنځه غړي وژل شوي وو. د پولیسو په وینا؛ د هغې پېښې تر شا هم د ځمکې لانجه وه.
د پاکستان لومړي وزیر شهباز شریف د دغه هېواد د اټومي ځواک د ورځې په مناسبت ویلي، د طالبانو «رژیم» د پاکستان پر ضد له هند سره مرسته کوي. نوموړي ټینګار کړی، چې اسلاماباد به د افغانستان په خاوره کې د ګواښونو د لهمنځه وړلو لپاره د افغان طالبانو پر ضد خپلو پوځي عملیاتو ته دوام ورکړي.
شهباز شریف د چهارشنبې په ورځ (د غبرګولي ۶مه) د پاکستان د اټومي ازموینو د کلیزې په مناسبت په یوه پیغام کې وویل، که پاکستان اټومي ځواک نه وای ګرځېدلی، دښمن به له هرې پولې اوښتی وای. هغه زیاته کړه، چې اټومي سپر او وسلهوال ځواکونه د پاکستان د دښمنانو پر وړاندې اصلي خنډ دي.
د پاکستان لومړي وزیر هند ته په اشارې سره وویل: «د افغانستان رژیم د دښمن د موخو د عملي کېدو لپاره زمینه برابروي. دښمن له ماتې وروسته اوس د نیابتي ډلو لکه فتنه الخوارج (تحریک طالبان پاکستان) او فتنه هندوستان (بلوڅ بېلتونپالو) ملاتړ کوي».
هغه خبرداری ورکړی، چې پاکستان به د «غضب للحق» پوځي عملیاتو له لارې دا ټول ګواښونه لهمنځه یوسي. طالبانو بیا د پاکستان پر وړاندې ځوابي بریدونه «ردالظلم» بللي دي.
د پاکستان د پوځي عملیاتو پراختیا او د مرګژوبلې شمېر
وروسته له هغې چې د طالبانو او پاکستان ترمنځ په ډیورند کرښه کې نښتې په بېسارې ډول زیاتې شوې، د پاکستان پوځ د «غضب للحق» په نوم عملیات پیل کړل، څو د افغانستان پر خاوره بریدونه ترسره کړي. تر دې وړاندې هم اسلاماباد د «عزم استحکام» تر نوم لاندې د بلوڅ وسلهوالو او د پاکستاني طالبانو د تحریک پر ضد ورته عملیات پیل کړي وو.
پاکستاني چارواکي ادعا کوي، چې د «غضب للحق» عملیاتو پر مهال تر اوسه له ۷۰۰ ډېر طالب جنګیالي وژل شوي؛ خو افغان طالبانو دغه شمېرې رد کړي دي.
طالبانو بیا د پاکستان د بریدونو پر وړاندې خپلو ځوابیه بریدونو ته د «ردالظلم» نوم ورکړی او ورسره یې له اسلاماباد سربېره د پاکستان پر بېلابېلو سیمو او په ځانګړې توګه پر پوځي مرکزونو د بریدونو او پاکستاني پوځیانو ته د مرګژوبلې د اړولو ادعا کړې ده.
اسلاماباد هیله لري، چې پوځي فشارونه او ګواښونه به د طالبانو اداره اړه کړي، څو پاکستاني جنګیالي له افغانستانه وباسي یا یې په خیبرپښتونخوا کې د بریدونو مخه ونیسي.
افغان طالبانو د پاکستان دغه غوښتنه نه ده منلې او د تحریک طالبان پاکستان مساله یې د دغه هېواد کورنۍ ستونزه بللې او همداراز یې د بریدونو پر مهال متقابل پوځي بریدونه کړي دي. دغو نښتو د افغانستان ګاونډي هېوادونه، په ځانګړي ډول چین اندېښمن کړي دي.
له دې سره سره، د تحریک طالبان پاکستان (ټيټيپي) د لوی اختر د درېیو ورځو لپاره د اوربند اعلان کړی، خو تر اوربند مخکې په خیبرپښتونخوا کې د نا امنیو لمن پراخه شوې وه.
د پاکستاني طالبانو تحریک د لوی اختر د درېو ورځو لپاره د اوربند اعلان وکړ | افغانستان انټرنشنل پښتو
له دغو څرګندونو سره هممهاله، د پاکستان پوځ د عامه اړیکو ادارې هم د ځمکنیو، هوايي او سمندري ځواکونو د قومندانانو له قوله په ګډه اعلامیه کې ویلي، چې د ۱۹۹۸ کال اټومي ازموینو په سویلي اسیا کې ستراتیژیک توازن رامنځته کړی دی.
د پاکستان پوځ دغه لاسته راوړنه د ملي یووالي ټینګښت او ملي حاکمیت نښه بللې او د هېواد دفاعي او ستراتیژیک وړتیاوې یې «مقدس ملي امانت» او په سیمه کې د سولې تضمین یاد کړی دی.
سره له دې چې پاکستان په افغانستان او قبایلي سیمو کې د پاکستاني طالبانو پر پټنځایونو بریدونه کړي، د دغو وسلهوالو بریدونه نه دي درېدلي او پاکستاني ځواکونه د ټيټيپي په ځانمرګو او چریکي بریدونو کې په پرلهپسې ډول وژل او یا هم ټپيان کېږي.
د پاکستان د پوځ مشر عاصم منیر د بلوچستان صوبې ژوب ولسوالۍ ته سفر کړی او هلته یې پر ډیورند کرښه له مېشتو عسکرو سره د لوی اختر لمونځ کړی دی. نوموړي په دې سفر کې ویلي، چې پاکستاني پوځیان د ترهګرۍ د مخنیوي او وسلهوالو د ځپلو لپاره عالي مورال لري.
د پاکستان پوځ د عامه اړیکو دفتر (ISPR) د چهارشنبې په ورځ (د غبرګولي ۶مه) د یوې خبرپاڼې په خپرولو سره ویلي، چې عاصم منیر په ژوب کې له پوځیانو سره د اختر لمونځ ادا کړ او د خپل هېواد د سولې، ثبات او د وژل شویو عسکرو ارواحو ته یې دعاګانې وکړې.
عاصم منیر د کوټې وروستي برید ته په اشارې سره وویل، چې دا ډول بېرحمانه بریدونه د ترهګرۍ پر وړاندې د پاکستان د وسلهوالو ځواکونو او د دغه هېواد د ملت هوډ نهشي کمزوری کولی.
هغه زیاته کړه، چې د دوی د عسکرو او ولس روحیه نه ماتېدونکې ده او پوځ به د امنیتي ارګانونو او د بلوچستان د خلکو په همکارۍ، د وسلهوالو د ټولو ملاتړو او عاملینو په نښه کولو ته په پوره ځواک سره دوام ورکړي.
د تېرې یکشنبې په سهار (د غبرګولي ۳مه) د بلوچستان په مرکز کوټه کې د پاکستاني سرتېرو پر لېږدونکي اورګاډي د موټر بم برید له امله شاوخوا ۲۴ کسان ووژل شول او له ۵۰ ډېر ټپیان شول.
د بلوڅانو د ازادۍ پوځ چې یوه بېلتون غوښتونکې ډله ده، د دغه برید مسوولیت پر غاړه اخیستی دی.
د تحریک انصاف د خیبر پښتونخوا مشر جنید اکبر ویلي، د دغه ګوند بندي بنسټګر او د پاکستان پخواني لومړي وزیر عمران خان ته اډیاله زندان کې د اختر د لمانځه د ادا کولو اجازه نهده ورکړل شوې. راپورونه وایي، نوموړي ته د امنیتي اندېښنو له امله د اختر لمانځه کې د ګډون اجازه نهده ورکړل شوې.
جنید اکبر د چهارشنبې په ورځ (د غبرګولي ۶مه) په خپله اېکسپاڼه په یوه خپاره کړي بیان کې لیکلي، چې حتی د نړۍ په تر ټولو بدنام زندان ګوانتانامو کې هم د غیر مسلمانانو لهخوا بندیانو ته د قران کریم او د لمانځه د ځای یا جاینماز بندوبست کېده.
هغه زیاته کړې، چې د پاکستان اوسنی حکومت د خپلو داسې کړنو له امله په نړیواله کچه رسوا شوی او په وینا یې دا ښيي چې هېواد د یو دولت په توګه له څومره اخلاقي زوال او «پستي» سره مخ دی.
د خیبر پښتونخوا دغه سیاسي مشر ادعا کړې، له کله راهیسې چې عمران خان نیول شوی دی، هغه ته په زندان کې د اختر د لمانځه د ادا کولو اجازه نهده ورکړل شوې.
په ورته وخت کې، په پاکستان کې نن د ورځې په اوږدو کې ګڼو رسنیو راپورونه ورکړي، چې د راولپنډۍ په اډیاله زندان کې عمران خان د امنیتي ګواښونو له امله د اختر له لمانځه محروم ساتل شوی دی.
د پاکستان تحریک انصاف ګوند بنسټګر عمران خان له تېرو درېیو کلونو راهیسې په زندان کې بندي دی او په محکمو کې یې پر ضد ګڼې دوسیې تر څېړنې لاندې دي.
د دغه ګوند پلویان او مشران په پرله پسې ډول د پاکستان پر حکومت تور پورې کوي، چې د دوی د مشر د اساسي او مذهبي حقونو سرغړونه کوي، خو حکومتي چارواکو تل د امنیتي تدابیرو په اساس د داسې پرېکړو دفاع کړې ده.
د بښنې نړیوال سازمان د پاکستان له حکومت څخه غوښتي چې د پښتون ژغورنې غورځنګ د فعال فریدالله اپریدي د تښتول کېدو په اړه سملاسي خپلواکې او رڼې پلټنې وکړي. فریدالله اپریدی د روانې مې میاشتې پر ۱۸مه (د غويي ۲۸مه) ماښام مهال د خیبر پښتونخوا له پېښور ښار څخه لادرکه شوی دی.
د بښنې نړۍوال سازمان د چهارشنبې په ورځ (د غبرګولي ۶مه) د یوې اعلامیې په خپرولو سره ویلي، سره له دې چې د فریدالله اپریدي کورنۍ د هغه د برخلیک په تړاو له پولیسو بار بار غوښتنه کړې، خو هغوی د لومړني معلوماتي راپور له ثبتولو او د نوموړي د لادرکه کېدو په اړه له هر ډول پلټنو ډډه کړې ده.
د اپریدي کورنۍ او د پيټياېم غړي د هغه د روغتیايي حالت او برخلیک په اړه سخت اندېښمن دي.
د بښنې نړیوال سازمان خبرداری ورکړی، چې د فریدالله اپریدي لادرکه کېدل کومه نوې پېښه نهده، بلکې دا د پښتون ژغورنې غورځنګ د فعالانو د جبري ورکولو او د پاکستاني چارواکو لهخوا د هغوی د ځپلو د یوې داسې لړۍ برخه ده، چې په دې وروستیو کې په بې ساري ډول زیاته شوې ده.
یاد سازمان ټینګار کړی، که فریدالله اپریدی د پاکستاني امنیتي ځواکونو په توقیف کې وي، باید سمدستي یې د ساتلو ځای په ډاګه او پرته له ځنډه خوشې کړل شي. د بښنې نړیوال سازمان همدا راز غوښتنه کړې، چې د نړیوالو بشري حقونو له معیارونو سره سم باید د نوموړي د تښتولو مسوولین وپېژندل شي او قانوني چلند ورسره وشي.
د یادونې وړ ده، چې دمګړۍ هم د پښتون ژغورنې غورځنګ یو شمېر غړي د پاکستان په زندانونوو کې شپې او ورځې تېروي.
د پاکستان مرستیال صدراعظم او د بهرنیو چارو وزیر اسحاق ډار په نیویارک کې د ملګرو ملتونو له سرمنشي انتونیو ګوتریش سره په خبرو کې ویلي، چې سوله ییز افغانستان د ټولې سیمې په ګټه دی، خو دده په وینا، لاهم «افغان خاوره د پاکستان خلاف کاریږي».
ډار د سې شنبې په ورځ د ملګرو ملتونو د امنیت شورا د پرانیستې مناظرې په څنډه کې د ملګرو ملتونو له سرمنشي انتونیو ګوتریش سره لیدلي دي.
د پاکستان د بهرنیو چارو وزارت د چارشنبې په ورځ وویل چې دواړو لوریو د سیمهییزو او نړیوالو بېلابېلو موضوعاتو په اړه نظرونه تبادله کړل، چې منځنی ختیځ، جنوبي اسیا، افغانستان، فلسطین او د ملګرو ملتونو د امنیت شورا اړوند اصلاحات پکې شامل وو.
اسحاق ډار د سېشنبې په ورځ نیویارک ته د مې له ۲۶مې تر ۲۸مې په یوه رسمي سفر تللی.
د پاکستان د بهرنیو چارو وزارت په وینا، ډار له ګوتریش سره په لیدنه کې ویلي، چې یو سولهییز افغانستان د سیمې د ثبات لپاره ډېر مهم دی خو په ورته وخت کې یې د هغو وسله والو ډلو له خوا د افغانستان د خاورې د کارولو په اړه اندېښنه ښودلې چې دده په وینا، د پاکستان پر ضد فعالیتونه کوي.
هغه یو ځل بیا ټینګار کړی، چې پاکستان د نړیوال قانون او د ملګرو ملتونو د منشور له اصولو سره سم د خپل ملي امنیت د ساتنې هوډ لري.