د طالبانو د عامې روغتیا وزارت چارواکو د لوی اختر په ورځو کې د کابل روغتونونو د عاجلو او دوامدارو روغتیايي خدمتونو پر فعال ساتلو ټینګار کړی او له روغتیايي مرکزونو یې غوښتي چې ناروغانو ته پر وخت او منظم خدمات وړاندې کړي.
د عامې روغتیا وزارت د پالیسۍ او روغتیايي پراختیا مرستیال ډاکټر محمد حسن غیاثي او د پالیسۍ او پلان عمومي رییس ډاکټر سیدرسول منګل د اختر په ورځو کې د کابل د علي جناح او استقلال روغتونونو له بېلابېلو څانګو لیدنه کړې ده.
د وزارت د خبرپاڼې له مخې، پلاوي د روغتونونو عاجلې څانګې، د ناروغانو د خدمتونو بهیر، د درملو او طبي تجهیزاتو موجودیت او د روغتیايي کارکوونکو حضور ارزولی او د روغتیايي خدمتونو د لا ښه تنظیم لپاره یې سپارښتنې کړې دي.
د عامې روغتیا وزارت ویلي، د اختر په شپو او ورځو کې په مرکز او ولایتونو کې روغتیايي مرکزونو ته د بشپړ چمتووالي او دوامدار فعالیت سپارښتنه شوې، څو ناروغانو ته پر وخت روغتیايي خدمات وړاندې او بېړنیو حالتونو ته ژر رسېدنه وشي.
د وزارت په وینا، د روغتونونو مسئولینو هم ډاډ ورکړی چې د اختر په ورځو کې به عاجل او نور روغتیايي خدمات په منظم ډول دوام ولري.
