کوېټ د توغندیز او ډرون برید خبر ورکړی
په کوېټ کې د چاودنو غږونو تر اورېدو وروسته د دغه هېواد پوځ اعلان کړی، چې یاد غږونه د کوېټ د هوايي دفاع سیسټمونو لهخوا د توغندیزو او ډرون بریدونو د شنډولو له امله رامنځته شوي دي. که څه هم د کوېټ پوځ د برید پخلی کړی؛ خو د موخو او زیانونو په اړه یې نور جزییات نهدي خپاره کړي.
کوېټ د ایران او امریکا ترمنځ د جګړې پرمهال څو ځله د ایران او عراق د ایران پلوه شیعه وسلهوالو له بریدونو سره مخ شوی و؛ خو د وروستي برید مسوولیت تر اوسه کومې ډلې نهدی منلی.
دغه پرمختګ داسې مهال شوی، چې منځنی ختیځ لا هم د ایران او امریکا ترمنځ د اوربند او روانو خبرو اترو له امله د سخت کړکېچ په حال کې دی. تر اوسه د هرمز تنګی چې د نړۍ د تېلو او طبیعي ګازو د لېږد یوه مهمه لار ګڼل کېږي، په بشپړ ډول نهدی پرانیستل شوی.
شنونکي خبرداری ورکوي، چې د هرمز تنګي تړل کېدو د نړۍ د انرژۍ ناورین نور هم ژور کړی او ښايي په راتلونکو اوونیو کې وضعیت لا کړکېچن شي.
بلخوا امریکايي چارواکو ویلي، د امریکا د مرکزي قوماندانۍ ځواکونو هرمز تنګي ته نږدې څلور ایراني ډرونونه نسکور کړي دي. د چارواکو په وینا؛ امریکايي ځواکونو د ایران په بندر عباس ښار کې د ډرونونو د کنټرول یوه اډه هم په نښه کړې، چې ټاکل شوې وه پنځمه بېپیلوټه الوتکه ترې وتوغول شي.
د ایران دولتي خبري اژانس اېرنا بندر عباس نړۍوال هوايي ډګر ته نږدې برید تایید کړی او ویلي یې دي، چې د غبرګون په توګه یې پر هغه هوايي اډه برید کړی چې دغه عملیات ترې ترسره شوي وو.
ایراني چارواکو د هدف په اړه نور معلومات نهدي ورکړي او دا هم لاروښانه نهده، چې پر کوېټ شوی برید له دغه پېښو سره مستقیم تړاو لري که نه.
