امریکا د هرمز تنګي د کنټرول لپاره د ایران پر نوې جوړې شوې ادارې بندیزونه ولګول
د امریکا خزانې وزارت ویلي، د «فارس خلیج د اوبو مدیریت هغه اداره» یې د بندیزونو په نوملړ کې شامله کړې چې ایران د هرمز تنګي له لارې د کښتیو تېرېدو د کنټرول لپاره جوړه کړې وه. دغه اداره په هرمز تنګي کې د کښتیو د تګراتګ لپاره د همغږۍ، جوازونو صادرولو او د مقرراتو ټاکلو مسوولیت لري.
په وروستیو اونیو کې تهران هڅه کړې، چې د یادې ادارې له لارې پر سمندري ټرافیک پراخ کنټرول ولري. د امریکا د خزانې وزارت د بهرنیو شتمنیو د کنټرول دفتر تر دې وړاندې خبرداری ورکړی و، چې د هرمز تنګي له لارې د ایران حکومت ته د هر ډول پیسو ورکول کولای شي اشخاص او شرکتونه له بندیزونو سره مخ کړي.
