سپاه پاسداران اعلان کړی، چې د پنجشنبې په سهار یې د بندر عباس هوايي ډګر پر شاوخوا سیمو د امریکا د برید په ځواب کې د دغه هېواد یوه هوايي اډه په نښه کړې. که څه هم سپاه پاسداران د یادې امریکایي اډې نوم نهدی اخیستی؛ خو د کوېټ پوځ د توغندیو او ډرون بریدونو د شنډولو خبر ورکړی.
امریکایي چارواکو ویلي، چې د هېواد پوځ هرمز تنګي ته نږدې څو ایراني ډرونونه وېشتي او د ډرون له توغولو سره تړلې یوه پوځي سیمه یې په نښه کړې ده؛ ښایي دغه پېښه د تهران او واشنګټن ترمنځ روانې خبرې اترې نورې هم پېچلې کړي.
پر بندر عباس برید
نن سهار د امریکا پوځ د ایران په بندر عباس ښار کې پر یوه پوځي مرکز تازه بریدونه کړي او هرمز تنګي ته نږدې یې څلور ایراني بریدګرې بېپیلوټه الوتکې نسکورې کړې دي. رویټرز خبري اژانس د یوه امریکايي چارواکي په حواله راپور ورکړی، هغه اډه چې په نښه شوې د ایران د ډرونونو او د ځمکني کنټرول مرکز و.
هغه ویلي، ټاکل شوې وه له هغه ځایه یوه بله بېپیلوټه الوتکه هم وتوغول شي. دغه امریکايي چارواکي ویلي، یاد بریدونه «محدود، حساب شوي او دفاعي» وو او موخه یې د اوربند ساتل دي.
د سپاه پاسداران غچ اخیستونکی برید
سپاه پاسداران اعلان کړی، چې د پنجشنبې په سهار یې د بندر عباس هوايي ډګر پر شاوخوا سیمو د امریکا د برید په ځواب کې د دغه هېواد یوه هوايي اډه په نښه کړه. د راپورونو له مخې؛ د چهارشنبې په ورځ په ځايي وخت شاوخوا ۱:۳۰ بجه د ایران سوېل د بندر عباس ښار په ختیځ کې د درېیو چاودنو غږونه اورېدل شوي.
تر دغه بریدونو وروسته د سپاه پاسداران د عامه اړیکو څانګې په یوه اعلامیه کې اعلان وکړ، چې دوی په ځایي وخت د سهار په ۴:۵۰ بجو د امریکا یوه هوايي اډه په نښه کړه. په اعلامیه کې ټینګار شوی، که د امریکا بریدونه تکرار شي؛ نو «پرېکنده» ځواب به ورکړل شي.
په کوېټ کې د توغندیزو بریدونو شنډېدلپه کوېټ کې د چاودنو غږونو تر اورېدو وروسته د دغه هېواد پوځ اعلان کړی، چې یاد غږونه د کوېټ د هوايي دفاع سیسټمونو لهخوا د توغندیزو او ډرون بریدونو د شنډولو له امله رامنځته شوي دي. که څه هم د کوېټ پوځ د برید پخلی کړی؛ خو د موخو او زیانونو په اړه یې نور جزییات نهدي خپاره کړي.
