امریکا په ایران کې پوځي موخې په نښه کړې؛ واشنګټن وایي بریدونه «دفاعي» وو
د امریکا پوځ د ایران په بندر عباس ښار کې پر یوه پوځي مرکز تازه بریدونه کړي او هرمز تنګي ته نږدې یې څلور ایراني بریدګرې بېپیلوټه الوتکې نسکورې کړې دي. رویټرز خبري اژانس د یوه امریکايي چارواکي په حواله راپور ورکړی، هغه اډه چې په نښه شوې د ایران د ډرونونو او د ځمکني کنټرول مرکز و.
هغه ویلي، ټاکل شوې وه له هغه ځایه یوه بله بېپیلوټه الوتکه هم وتوغول شي. دغه امریکايي چارواکي ویلي، یاد بریدونه «محدود، حساب شوي او دفاعي» وو او موخه یې د اوربند ساتل دي.
دغه بریدونه داسې مهال شوي، چې د امریکا او ایران ترمنځ د درې میاشتنۍ جګړې د پای ته رسولو لپاره خبرې اترې لاهم روانې دي. دغه جګړه (د فبرورۍ په ۲۸مه) د امریکا او اسراییل له بریدونو وروسته پیل شوې وه، چې له امله یې زرګونه کسان وژل شوي او د نړۍ د انرژۍ بیې لوړې شوې دي.
بلخوا د امریکا ولسمشر ډونالډ ټرمپ د ایران دولتي رسنیو هغه راپور رد کړی، چې ګواکې تهران او عمان به د سولې د یوې هوکړې په چوکاټ کې د هرمز تنګي د بېړیو تګراتګ په ګډه اداره کوي.
بل لور ته ټرمپ ویلي، د هرمز تنګی به پرانیستی پاتې شي.
د یادونې وړ ده، چې امریکا تر دې وړاندې هم د دوشنبې په ورځ پر ایران بریدونه کړي وو، چې واشنګټن یې «دفاعي اقدامات» بولي؛ خو ایران دغه کار له نازک اوربند نه ښکاره سرغړونه ګڼلې ده.
د امریکا د مرکزي قوماندانۍ په وینا؛ په دغه عملیاتو کې هغه کښتۍ او توغندیز مرکزونه په نښه شوي، چې امریکايي ځواکونو ته یې ګواښ پېښاوه.
