د جودو او کورش پخوانی افغان لوبغاړی اسماعیل کاکړ په جرمني کې ومړ
د افغانستان د کورش، سامبو او غېږ نیونې فدراسیون د جرمني په برلین کې د افغانستان د ملي جوډو او کورش لوبډلې د پخواني غړي اسماعیل کاکړ مړینه تایید کړې ده. د راپورونو له مخې؛ دغه مشهور افغان لوبغاړی د چهارشنبې په ورځ د جرمني په برلین کې د زړه د حملې له امله مړ شوی.
اسماعیل کاکړ یو مشهور افغان لوبغاړی و، چې په کورنیو سیالیو کې یې لسګونه مډالونه ګټلي وو او په نړۍوالو سیالیو کې یې هم ښې لاسته راوړنې لرلې. هغه تېر زېږدیز کال د فرانسې د پاریس په نړۍوالو سیالیو کې د سپینو زرو مډال ترلاسه کړی و.
د افغانستان د کورش فدراسیون په یوه خبرپاڼه کې ویلي: «په ډېرې خواشینۍ سره تېره شپه د افغانستان د کورش اتل اسماعیل کاکړ د زړه د حملې له امله وفات شو». اسماعیل کاکړ د کندوز ولایت اوسېدونکی و او له دوو کلونو راهیسې یې د جرمني په برلین ښار کې ژوند کاوه.
هغه له افغانستان نه تر وتلو وروسته هم خپلو ورزشي فعالیتونو ته دوام ورکړ او په نړۍواله کچه یې مهمې لاسته راوړنې لرلې.
