کابل مېشتی: طالبانو د اختر په دویمه ورځ د کورنیو لپاه د تفریحي پارک دروازه وتړله
یو کابل مېشتي افغانستان انټرنشنل ته ویلي، چې طالبانو د لوی اختر په دویمه ورځ د کابل د «امېد ښارګوټي» پارک د خلکو پر مخ تړلی دی. د نوموړي په وینا؛ د طالبانو امر بالمعروف محتسبانو هغه مهال پارک وتاړه، چې په پارک کې یې یوشمېر ښځې او ماشومان په زانګوګانو او تفریحي وسایلو کې ولیدل.
هغه وايي، ګڼ شمېر کورنۍ د اختر د خوښۍ او مېلو لپاره پارک ته ورغلې وې او غوښتل یې چې د اختر ورځې له خپلو ماشومانو او کورنۍ سره په خوښۍ تېرې کړي؛ خو د طالبانو له لوري د پارک تړل کېدو د خلکو خوښي خرابه کړه.
دغه کابل مېشتي زیاته کړې، چې د پارک له تړل کېدو وروسته یوشمېر کورنۍ اړې شوې چې پرته له تفریح بېرته خپلو کورونو ته ستنې شي. دا په داسې حال کې ده، چې طالبانو له دې وړاندې پر ښځو پارکونو، تفریحي ځایونو او ګڼو عامه سیمو ته د تګ محدودیتونه لګولي دي.
سربېره پر دې د ښځو پر زدهکړو، کار، سفر او نورو ټولنیزو فعالیتونو هم پراخ بندیزونه لګېدلي دي. د طالبانو دغه محدودیتونه او د ښځو پر وړاندې سخت دریځونه په کور دننه او نړۍواله کچه له پراخو غبرګونونو او نیوکو سره مخ شوې او ګڼو نړۍوالو بنسټونو دغه اقدامات د ښځو او بشري حقونو خلاف بللي دي.
