د خیبر پښتونخوا په کوهاټ کې د پاکستاني عسکرو او وسلهوالو ترمنځ نښته کې ۷ کسان وژل شوي
سرچینو افغانستان انټرنشنل ته ویلي، چې د خیبر پښتونخوا د کوهاټ ولسوالۍ اړوند د دره ادمخېل په تور څپر سیمه کې د امنیتي ځواکونو او وسلهوالو ترمنځ په نښته کې ۵ وسلهوال او دوه پاکستاني عسکر وژل شوي دي. امنیتي سرچینو زیاته کړې، چې په دې نښته کې څلور نور پاکستاني عسکر ټپیان شوي دي.
امنیتي چارواکو څرګنده کړې، چې دغه عملیات د استخباراتي معلوماتو پر بنسټ وروسته له هغې پلان شول، چې پاکستاني ځواکونو ته په سیمه کې د وسلهوالو د حضور په اړه راپورونه ورسېدل. سرچینې وایي، پاکستاني ځواکونو لومړی د تور څپر غرنۍ سیمه کلابنده کړه او د عملیاتو پر مهال د دواړو لورو ترمنځ سخته نښته وشوه.
د چارواکو په وینا، په دغو عملیاتو کې د وسلهوالو یو پټنځای په بشپړ ډول لهمنځه وړل شوی دی.
تر اوسه هېڅ وسلهوالې ډلې د دغې نښتې په تړاو څه نهدي ویلي. پاکستاني امنیتي مسوولین وایي، چې دغه عملیات به تر هغې روان وي چې سیمه په بشپړ ډول د وسلهوالو له موجودیت څخه پاکه او خوندي شي.
د خیبر پښتونخوا په بېلابېلو سیمو په ځانګړي ډول قبایلي سیمو کې په دې وروستیو کې ناامني زیاته شوې او ډېری قربانیان یې ځايي اوسېدونکي دي.
