ټرمپ: د ایران پر وړاندې پوځي انتخاب لاهم پر مېز دی
د امریکا ولسمشر ډونالډ ټرمپ ویلي، چې واشنګټن د ایران له حکومت سره په خبرو اترو کې «د فشارونو په برخه کې پیاوړی نفوذ» لري. هغه خبرداری ورکړی، که خبرې اترې د امریکا په ګټه یوې هوکړې ته ونه رسېږي؛ نو د پوځي اقدام انتخاب به د مېز په سر پاتې شي.
ټرمپ د پنجشنبې په ورځ له فاکسنیوز سره په مرکه کې ویلي، «هغه معامله چې زموږ لپاره ښه نهوي، ریښتینې نهده. په پای کې زه موضوع ارزوم او پایله ګورو، دا هغه څه دي چې زه یې کوم. زه مذاکره کوم، دوی مذاکره کوي، دوی ډېر ښه مذاکره کوونکي دي او دوی د تړون متن لیکي. خو په پای کې موږ ټول کارتونه لرو؛ ځکه موږ دوی ته په پوځي توګه ماتې ورکړې ده».
ټرمپ د ایران پر پوځ د برید نه کولو لاملونو په اړه وویل: «موږ د دوی پوځ یو څه روغ پرېښود؛ ځکه چې موږ فکر کاوه د دوی د پوځ یوه برخه نسبتا معتدله ده. هو، موږ په قصدي ډول د دوی پوځ په نښه نهکړ. ښایي زما د دغه خبرو په اورېدو حیران شي؛ خو په جګړو کې داسې پېښې شوې دي، چې هرڅه ویجاړ شوي او بیا هېواد د څلوېښتو کلونو لپاره بیارغونه نهشوه کولی. وګورئ چې په عراق کې څه پېښ شوي».
ورته مهال ایراني رسنیو د اسلامي شورا د مجلس د لومړۍ دورې د پرانیستې کلیزې په مناسبت مجتبی خامنهيي ته منسوب یو پیغام خپور کړی، چې په یوه برخه کې یې راغلي:« له پوځي او اقتصادي فشارونو وروسته دښمن د ټولنیز درز او د ټولنې د تجزیې رامنځته کولو په لټه کې دی».
د هغه په وینا؛ حکومت ته وفادار ځواکونه باید د اختلافاتو د رامنځته کېدو مخه ونیسي.
