د افغانستان د فوټبال ملي لوبډله د مالدیف نړیوال ټورنمنټ کې د ګډون لپاره دغه هېواد ته لاړه
د افغانستان د فوټبال ملي لوبډله د «الماس جوبیلي» په نوم په څلور اړخیزو نړیوالو سیالیو کې د ګډون لپاره مالدیف ته روانه شوه. دغه سیالۍ به د افغانستان، مالدیف، پاکستان او بنګلهدېش د ۲۳ کلنو لوبډلې په ګډون د غبرګولي له ۱۱مې تر ۲۰مې پورې د مالدیف په پلازمېنه ماله کې ترسره شي.
دا سیالۍ د مالدیف د فوټبال د پنځه اویا کلنۍ په مناسبت جوړېږي او موخه یې د راتلونکو سیالیو لپاره د سیمې د لوبډلو چمتو کول بلل شوې ده.
د اعلان شوي مهالوېش لهمخې، د افغانستان ملي لوبډله به خپله لومړۍ لوبه د غبرګولي په ۱۱مه د مالدیف ملي لوبډلې پر وړاندې ترسره کړي. دویمه لوبه به د غبرګولي په ۱۴مه د بنګلهدېش د ۲۳ کلنو لوبډلې پر وړاندې ترسره کړي او په درېیمه لوبه کې به د غبرګولي په ۱۷مه د پاکستان له ملي لوبډلې سره مخ شي.
د دغو سیالیو پایلوبه به د غبرګولي په ۲۰مه ترسره شي.
د افغانستان د فوټبال ملي لوبډلې روزنیز پلاوي د دغو سیالیو لپاره ۲۳ لوبغاړي غوره کړي دي. په دې نوملړ کې تجربهلرونکي او ځوان لوبغاړي دواړه شامل دي.
د افغانستان ملي لوبډلې د لوبغاړو نوملړ
فیصل احمد حمیدي، کیوان متقیان، عليسینا حکیمي، مصور احدي، مصطفی عمرخېل، احمد شکیب مهري، عمید ارزو، علي رایض مرادي، حبیبالله عسکر، نوید محبوبي، عليرضا پناهي، الیاس منصور، حامد مومند، رحمت اکبري، جمشید اڅکزی، ساحل سروري، امین نبيزاده، امید موسوي، مازیار کوهیار، امید پوپلزی، یاسر صافي، رومین فازي او محبوب حنفي.
د افغانستان فوټبال په وروستیو کلونو کې له بېلابېلو ستونزو سره مخ وو؛ له پرلهپسې ماتو، د نړیوالو سیالیو له کمښت، تر بنسټیزو ننګونو او مالي محدودیتونو پورې. خو د افغانستان ملي لوبډله هڅه کوي، چې د اسیا په کچه خپل ځای وساتي او له سیالانو سره سیالي وکړي.
