د روسیې د امنیت شورا مرستیال سکرتر الکساندر وینیدیكتوف ویلي چې مسکو چمتو دی د افغانستان او پاکستان ترمنځ د شخړې او نورو اختلافاتو د حل لپاره د منځګړیتوب رول ادا کړي.
نوموړي ویلي چې روسیه په سیمه کې د ثبات د ټینګښت لپاره هڅه کوي او غواړي د کابل او اسلاماباد ترمنځ د اړیکو د ښه کېدو لپاره عملي ډیپلوماټیک ګامونه واخلي.
په همدې حال کې، د پاکستان امنیتي چارو شنونکي طاهر نذیر ویلي چې روسیه د منځګړي رول د لوبولو مناسب ظرفیت لري، ځکه دوي له طالبانو سره رسمي اړیکې لري او همداسې له پاکستان سره د امنیتي موضوعاتو په اړه دوامداره تماسونه لري او ورته وخت کې په سیمه کې د ثبات ساتلو ته ځانګړې علاقه لري.
نوموړي ویلي: «د روسیې د منځګړیتوب وړاندیز یو مثبت اقدام دی او باید په ښه ډول ورسره تعامل وشي.»
بل پاکستاني مالي چارو کارپوه جاوید حسن هم ویلي چې اسلاماباد باید له دې فرصت څخه استفاده وکړي، ځکه د افغانستان سره باثباته اړیکې د سیمهییزې سوداګرۍ لپاره مهمې دي.
هغه زیاته کړې: «هر هغه فرصت چې د طالبانو له مشرانو سره د ستونزو د حل لپاره خبرې اسانه کړي او دوامدار حل ته لاره هواره کړي، منطقي ګامونه دي دی.»
د کارپوه په وینا، که د کابل او اسلاماباد اړیکې عادي شي، افغانستان کولی شي د ترانزیټي دهلېز په توګه عمل وکړي او د پاکستان د کراچۍ او ګوادر بندر له لارې د مرکزي اسیا له هغه هېوادونو سره نښلونکی رول ولوبوي چې سمندر سره ندي وصل، چې دا به د سوداګرۍ د وخت او لګښتونو په کمولو کې مهم بدلون راولي.
