د مونیخ هوايي ډګر د یوې بېپیلوټه الوتکې د لیدل کېدو له امله تړل شوی دی
د جرمني د مونیخ هوايي ډګر د یوې بېپیلوټه الوتکې د لیدل کېدو د راپورونو له امله خپل دواړه ځغاستلیکي په بشپړ ډول تړلې دي. د جرمني د فدرال پولیسو تایید کړې، چې د یوې الوتکې پیلوټ په سیمه کې د دغې بېپیلوټه الوتکې د شکمن فعالیت په اړه امنیتي ارګانونو ته خبر ورکړی و.
د جرمني د فوکس انلاین د راپور له مخې، دغه هوايي ډګر د څو ساعتونو لپاره په بشپړ ډول تړل شوی دی او اوسمهال د پولیسو امنیتي هیلیکوپټرې په فضا کې د یادې بېپيلوټه الوتکې د موندلو او لټون په موخه الوتنې کوي. د مسوولینو له لوري په هوايي ډګر کې رامنځته شوی وضعیت لا هم نامشخص او تر څېړنې لاندې اعلان شوی دی.
