د افغانستان لپاره د ملګرو ملتونو د ماشومانو د ملاتړ صندق مشر تاجالدین اویوال ویلي، چې په افغانستان کې د واکسین د کمپاینونو د ملاتړ په تړاو یې د بېل ګېټس خیریه بنسټ سره ناسته کړې او یاد بنسټ په افغانستان کې د پولیو ضد واکسین له کمپاین سره د ملاتړ ډاډ ورکړی دی.
په افغانستان کې د یونېسف مشر تاجالدین ایوال نن د شنبې په ورځ، د غبرګولي په ۹مه په خپلې اېکسذپاڼې لیکلي، چې د بېل ګېټس بنسټ چارواکو په افغانستان کې د پولیو ناروغۍ د بشپړ له منځه وړولو په کمپاینونو کې د خپل دوامداره ګډون او ملاتړ ډاډ ورکړی دی.
په افغانستان کې د ملګرو ملتونو دغه چارواکي زیاته کړې، چې یونېسف د اړینو روغتیايي پاملرنو، تغذيې، معافیت پیاوړتیا او د پولیو د له منځه وړلو په برخه کې د یاد بنسټ له مرستو او ملاتړ ستاینه کوي.
دا په داسې حال کې ده چې د طالبانو د عامې روغتیا وزارت د تېرې غوايي میاشتې په ۲۴مه نېټه، له نړیوالو روغتیايي بنسټونو سره په همکارۍ په ټول هېواد کې د پولیو ضد واکسین د عمومي کمپاین د پیلېدو خبر ورکړی و. د دغه وزارت د معلوماتو له مخې، په دغه کمپاین کې به د هېواد په کچه تر پېنځو کلونو کم عمره شاوخوا ۱۲ میلیونه ماشومانو ته د پولیو ضد واکسین څاڅکي ورکړل شي.
د یادونې وړ ده چې افغانستان او پاکستان د نړۍ یوازیني دوه هېوادونه دي چې لا هم پکې د ماشومانو د فلج (پولیو) ناروغۍ مثبتو پېښو ثبتېدو راپور ورکول کېږي. د ملګرو ملتونو د شمېرو پر بنسټ، په تېر ۲۰۲۵ میلادي کال کې د پولیو لږ تر لږه ۹ مثتبې پېښې په افغانستان او ۳۳ مثبتې پېښې ثبت شوې وې.
