د طالبانو د کار او ټولنیزو چارو وزارت ویلي، چې د لوی اختر له رخصتیو وروسته په مرکز او ټولو ولایتونو کې د دولتي ادارو د کارکوونکو د حاضرۍ او فعالیتونو سراسري ارزونه پیلوي. دغه وزارت زیاته کړې، چې دا څار د رييس الوزرا د حکم او د کاري رژیم پر بنسټ عملي کېږي.
دغه وزارت د شنبې په ورځ (د غبرګولي ۹مه) د یوې خبرپاڼې په خپرولو سره ویلي، د مفتشینو ډلې به نه یوازې د کارکوونکو حاضري او د دندو څرنګوالی وارزوي، بلکې د چارو د پرمخ وړلو څرنګوالی، اداري نظم، د خدمتونو کیفیت او د مراجعینو د اړتیاوو پر وړاندې د ادارو ځواب وینه هم وسنجوي.
وزارت ټینګار کړی، چې څارنه به په ټول هېواد کې هممهاله پیل شي.
په خبرپاڼه کې راغلي، چې په دې سره به د روڼتیا، حسابورکونې او مسوولیتمننې کچه لوړه شي او د خدماتو په وړاندې کولو کې به ځنډونه راکمه شي او همدارنګه تمه ښودل شوې، چې اړوندې ادارې به پر وخت او معیاري خدمتونه وړاندې کړي.
په خبرپاڼه کې ویل شوي، چې د تفتیش اساسي موخه د خلکو د قناعت ترلاسه کول دي؛ په دې توګه به د چارو په ترسره کولو کې د خنډونو او ځنډونو مخه ونیول شي او یو منظم، اغېزناک او ځوابورکوونکي اداري نظام رامنځته شي. وزارت د ټولو ادارو له کارکوونکو غوښتي چې له مفتشینو سره همکاري وکړي.
د ادارو د تفتیش او حسابورکونې موضوع د طالبانو تر کنټرول لاندې ادارو کې څو ځله یاده شوې، خو د بشري حقونو بنسټونه او مدني فعالان ترې د روڼتیا، مسلکي جذب، او د خدماتو د معیاري کېدو عیني پایلو غوښتنه کوي. هممهاله د طالبانو په ادارو کې د پراخ فساد او بېعدالتۍ راپورونه هم ورکړل شوي دي.
