د طالبانو ویاند ذبیحالله مجاهد له افغانستان انټرنشنل سره په یوه ځانګړې مرکه کې په زندانونو کې د بندیانو د شکنجې راپورونه په کلکه رد کړل او ویې ویل، چې د دوی د اصولو له مخې د تورنو کسانو هر ډول ځورونه منع ده.
ذبیحالله مجاهد د افغانستان انټرنشنل د مشري اډېټرې نویده خوشبو ته په خپلو خبرو کې وویل: «په زندانونو کې هېڅ شکنجه نشته او دا عمل په بشپړ ډول منع دی. زموږ د قوانینو له مخې د نیول کېدو له مرحلې څخه تر توقیف او خوشې کېدو پورې پر هېڅ چا شکنجه نه پلي کېږي.»
د طالبانو ویاند د «شکنجه کولو» او «قانوني سزا» ترمنځ توپیر وکړ، او زیاته یې کړه چې خلکو ته یوازې د شرعي قانون پر بنسټ او د دوی د جرم سره مناسب سزا ورکول کیږي او په خپلسري نه شي کولی. نوموړي په ټینکار سره وویل:« اوس مهال په استخباراتي ادارو، د پولیسو په ادارو او په هېڅ زندان کې هېڅ ډول شکنجه نشته».
دا په داسې حال کې ده، چې تېره ورځ د غبرګولي پر ۸مه د ملګرو ملتونو امنیت شورا په خپل تازه راپور کې ویلي و، چې په افغانستان کې د طالبانو غړو او چارواکو له لوري د ۲۱ ښځو او نجونو پر وړاندې د تاوتریخوالي او جنسي تېري پېښې ثبت او تایید شوې دي.
د یوناما د راپور له مخې؛ په دغه پېښو کې جنسي تېری، ډلهییز جنسي تېری، جبري ودونه او په جبري توګه د ښځو بربنډول شامل دي. ملګرو ملتونو ویلي، چې دغه پېښې د ۲۰۲۵کال پرمهال د ۱۵ ښځو او ۶ نجونو پر وړاندې ترسره شوې دي.
په افغانستان کې د ملګرو ملتونو مرستندویه ماموریت (یوناما) ویلي، هغه ښځې چې د طالبانو د محدودوونکو سیاستونو پر ضد غږ پورته کوي؛ له خپلسرو نیونو، شکنجو او ناوړه چلند سره مخ کېږي.
دا څرګندونې په داسې وخت کې کېږي، چې نړیوالو سازمانونو او د بشري حقونو ادارو په وار وار د زندانیانو د وضعیت او د طالبانو په زندانونو کې د شکنجې راپورونو په اړه اندېښنه څرګنده کړې ده.
د طالبانو ویاند دا راپورونه رد کړل او ویې ویل: «په دې اړه خپاره شوي راپورونه په بشپړه توګه له حقیقت څخه لرې دي او موږ یې په کلکه ردوو.»
