په فاریاب کې د طالبانو تر واک لاندې د افغانستان برېښنا شرکت ویلي، چې فاریاب او جوزجان ته له ترکمنستان څخه د وارداتي برېښنا ۲۲۰ کیلو ولټه مزو کې تخنیکي ستونزه پیدا شوې، چې له امله پر فاریاب او جوزجان ولایتونو وارداتي برېښنا قطع شوې ده.
په فاریاب کې د افغانستان برېښنا شرکت ریاست نن د شنبې په ورځ، د غبرګولي ۹مه د یوې خبرتیا په خپرولو سره پر یادو ولایتونو د وارداتي برېښنا قطع کېدو لامل تخنیکي ستونزه بللې ده، خو د رامنځته شوې ستونزې د نوعیت په اړه یې نور جزییات نه دې شریک کړي.
همدارنګه یادې ادارې دا هم نه ده په ډاګه کړي، چې د فاریاب او جوزجان ولایتونو د برېښنا نشتوالي ستونزه به تر کومې مودې حل او بېرته ورغول شي.
سرچینو افغانستان انټرنشنل ته ویلي، چې د طالبانو د عدلیې وزیر عبدالحکیم شرعي د دغه وزارت د مدافع وکیلانو د ریاست رییس مولوي جان محمد طلحه په یوه ازموینه کې د فساد له امله له خپلې دندې منفک کړی دی. د سرچینو په وینا، یاد طالب د وکالت د جوازونو د ازموینې پوښتنې افشا کړې وې.
د طالبانو باوري سرچینو نن شنبه د غبرګولي ۹مه وویل، چې د عدلیې وزارت اړوند د مدافع وکیلانو ریاست د تېرې غوايي میاشتې پر ۱۸مه نېټه د دفاع وکالت د جوازونو له غوښتونکو څخه په یاد وزارت کې ازموینه اخیستې وه. د سرچینو د معلوماتو له مخې، د دغه ریاست رییس مولوي جان محمد طلحه د ازموینې پوښتنې له خپلو ځینو کسانو سره شریکې کړې وې او د ازموینې له پیلېدو څخه وړاندې سوالونه وېشل شوي وو.
طالبانو د عدلیې وزارت تروسه د مدافع وکیلانو ریاست رییس مولوي جان محمد طلحه د منفک کېدو په تړاو تروسه سه نه دي ویلي.
یو شمېر مدافع وکیلانو افغانستان انټرنشنل ته وویل، چې طالبانو د عدلیې وزارت د مدافع وکیلانو ریاست د رییس لوري پر خپلو ملګرو یا هم د طالبانو پر غړو د ازموینې د پوښتونو وېشل کېدو سره غواړي، داسې کسان د مدافع وکلات جوازونه ترلاسه کړي چې یوازې د دوی د ډلې غړیتوب ولري.
د طالبانو د عدلیې وزارت د اعلامیې له مخې د مدافع وکیلانو ریاست رییس مولوي جان محمد طالحه د یاد وزارت د وزیر پر وړاندې او د طالبانو د رییس الوزرا ملاحسن اخوند په منظوری شاوخوا ۵ میاشتې وړاندې په دې دنده ګمارل شوی و.
مولوي جان محمد طالحه له دې وړاندې په عدلیې وزارت د د حقوقي مرستو ریاست رییس په توګه کار کاوه.
د طالبانو په ادارو کې د اداري او مالي فساد شتون کومه نوې خبره نه ده خو دا ډله تر ډېره هڅه کوي چې د خپلې ډلې په فساد کې ککړ مسوولینو دوسیې پټې وساتي.
د طالبانو د بیا ځلي واک ته رسېدو سره یاده ډله په څرګند ډول په ادارو کې هغه کسان ګماري چې ددې ډلې غړیتوب او د تصفیې کمېسیون تایدي ولري.
د طالبانو د دفاع وزیر له مسکو څخه له راستنېدو وروسته د کابل په هوايي ډګر کې خبریالانو ته ویلي، چې نور به پاکستان هېڅکله د افغانستان پر خاوره د برید جرئت ونه کړي. محمد یعقوب مجاهد وویل، چې د طالبانو او روسیې ترمنځ د پوځي همکاریو د تړون عملي چارې به په راتلونکو ورځو کې پیل شي.
د طالبانو د دفاع وزیر محمد یعقوب مجاهد نن د شنبې په ورځ، د غبرګولي ۹مه د کابل په هوايي ډګر کې مسکو ته خپل سفر خورا بریالی وباله او له روسیې سره یې د «پوځي او تخنیکي» همکاریو د هوکړهلیک جزئیات له رسنیو سره شریک کړل.
په ورته مهال نوموړي ټینګار وکړ چې دا تړون د دفاعي-امنیت تړون نه دی او باید د هېوادونو لپاره د اندېښنې لامل نه وي.
هغه وویل چې دا تړون یوازې د روسیې جوړو شویو وسلو د بیارغونې او ساتنې لپاره دی: «تاسو ګورئ چې په افغانستان کې ډیری روسي وسلې شتون لري په شمول د چورلکو او الوتکو چې ترمیم ته اړتیا لري. موږ اړ یو چې له هغو هیوادونو سره تړونونه لاسلیک کړو چې دا وسلې یې جوړې کړې ترڅو موږ وکولی شو دا تجهیزات په سمه توګه وکاروو».
له امریکا سره هوکړه کوو
مجاهد د خپلې وینا په یوه بله برخه کې هڅه وکړه چې د تړون په اړه نړیوال حساسیتونه کم کړي. هغه روښانه کړه چې دا سند هیڅ هېواد ته ګواښ یا خطر نه رامینځته کوي، بلکې د سیمه ایز امنیت ډاډمن کولو کې مرسته کوي.
نوموړي ان د واشنګټن سره د همکارۍ امکان هم یاد کړ او زیاته یې کړه:«موږ کولی شو له امریکا سره هم داسې تړونونه ولرو؛ ځکه دلته د هغوی هم ډېري وسسلې پاتې شوې دي».
د طالبانو د دفاع وزیر ټینګار وکړ چې افغانستان د هوایي دفاع سیستم ته اړتیا لري او طالبان به په راتلونکي کې دا و ارزوي چې یاد سیستم له کومو هیوادونو څخه وارد کړي.
مجاهد زیاته کړه چې له روسیې سره د دغه هوکړهلیک د پلي کېدو بهیر به ډېر ژر پیل شي.
د پاکستان اندیښنو ته ځواب
د طالبانو د دفاع وزیر په څرګنده توګه د کابل د وروستیو اقداماتو په اړه د اسلام اباد غوسې او اندېښنې ته اشاره وکړه ویې ویل چې دا تړون د پاکستان لپاره د اندېښنې سرچینه ګرځیدلې ده.
هغه په خبرداري سره زیاته کړه: «موږ به په نږدې راتلونکي کې هڅه وکړو چې پاکستان نور د افغانستان پر خاوره باندې د برید جرئت ونکړي»
دا څرګندونې په داسې حال کې کیږي چې په وروستیو میاشتو کې د پاکستان د پوځ راکټي او هوایي بریدونو د دواړو خواوو ترمنځ اړیکې سختې ترینګلې کړې دي.
څارونکي وايي چې طالبان سره له دې چې له روسیې سره تخنیکي تړون لاسلیک کړی، هڅه کوي چې ځان خپلواک وښيي.
باخبره سرچینو افغانستان انټرنشنل ته وویل، چې د ولسي جرګي پخوانی مرستیال او سوداګر میرزا ګټوازی د امریکا په واشنګټن هوايي ډګر کې نیول شوی دی. د سرچینو په وینا، ګټوازی د دې له امله نیول شوی دی، چې ګرین کارټ په لرلو سره یې افغانستان ته سفر کړی و او پلټنې ترې روانې دي.
میرزا ګټوازي ته نژدې سرچینو نن شنبه، د غبرګولي پر ۹مه وویل، چې له نوموړي سره امریکا ته په سفر کې د هغه مېرمنې هم ملتیا کوله، خو مېرمنې ته یې اجازه ورکړل شوې چې له هوايي ډګره ووځي. دغو سرچینو زیاته کړې، چې کټوازی د مالي فساد په کومه موضوع کې نه دی نیول شوی، بلکې یوازې افغانستان ته د سفر کولو له امله تر پوښتنو ګروېږنو لاندې دی. دوی دغه راز وایي، په همدې هوايي ډګر کې ځینې نور هغه کسان هم نیول شوي چې د ګرین کارټ په لرلو سره یې طالبانو تر واک لاندې افغانستان ته سفرونه کړي وو.
د میرزا ګټوازي له نیول کېدو نژدې دوه ورځې تېریږي خو تروسه د امریکا امنیتي ادارو د هغه د نیولو په اړه کوم غبرګون نه دی ښودلی او نه یې په دې اړه معلومات خپاره کړي دي.
مېرزا ګټوازی نه یوازې د تېر جمهوري نظام د ولسي جرګې مرستیال تېر شوی دی بلکې دی اوس مهال د افغان سوداګر تر نامه لاندې د طالبانو د بیا ځلي واک ته رسېدو سره دی افغانستان کې دننه پاتې شو او خپلو سوداګریزو چارو ته ادامه ور کړه.
تېر کال د زمري څلورمه او پنځمه درېیو سرچینو افغانستان انټرنشنل ته ویلی، چې طالبانو د ځمکو په اسنادو کې د «جعل» په تور د پخوانۍ ولسي جرګې د مرستیال محمد میرزا کټوازي شاوخوا ۲۰ همکاران نیولي دي. سرچینې ویلي و، دغه کسان د عبدالحکیم شرعي په امر نیول شوي او د هغه شخصي زندان ته اچول شوي ول.
تېر ۱۴۰۴ کال د زمري په میاشت کې د طالبانو د ځمکو د غصب مخنیوي کمیسیون یو رسمي مکتوب افغانستان انټرنشنل ترلاسه کړی و،چې د یاد کمیسیون رییس عبدالحکیم شرعي پکې د طالبانو له بېلابېلو ادارو غوښتي چې د میرزا کټوازي قراردادونه لغوه کړي. په مکتوب کې راغلي چې میرزا کټوازی د مختلفو توکو په قاچاق کې لاس لري.
په ټولنیزو رسنیو کې د هغه د نیول کېدو په تړاو ادعاوې شوي، چې نوموړي د طالبانو د ځیني مشرانو پیسو په سپینولو کې ونډه لري او په ځانګړې توګه د حقاني شبکې مشر سراج الدین حقاني سره نژدې اړیکې لري او ښايي چې د امریکا امنیتي ادارو له دې لامل له امله نیولي وي.
تروسه میرزا ګټوازي او د هغه کورنۍ د نوموړي د نیول کېدو په اړه په رسمي ډول څه نه دي ویلي او نه یې هم ددې تورونو په اړه سپیناوي ور کړی دی.
د طالبانو تر واک لاندې د افغاني سرې میاشتې ټولنې ویلي چې د ترکیې هېواد د سرې میاشتې په مالي ملاتړ یې په کاپیسا او لوګر ولایتونو کې یې پر ۱۶۰۰ اړمنو کورنیو د قربانۍ ۸ټنه غوښه وېشلې ده.
د دغې ټولنې په خپره شوې خبرپاڼه کې راغلي چې له یادې مرستې څخه په لوګر کې ۸۰۰ او په کاپیسا کې هم ۸۰۰ کورنیو ګټه اخیستې ده. د معلوماتو له مخې، هرې کورنۍ ۵ کیلوګرامه د قربانۍ غوښه ترلاسه کړې.
خبرپاڼه زیاتوي چې دغه مرسته د ترکیې د سرې میاشتې ټولنې په مالي ملاتړ او د افغاني سرې میاشتې په همغږۍ وېشل شوې ده.
د یادې مرستې موخه د لوی اختر په مناسبت د اړمنو کورنیو لاسنیوی او د هغوی د لومړنیو اړتیاوو د پوره کولو لپاره مرسته بلل شوې ده.
د خیبر پښتونخوا د لنډي کوتل مرستیال کمېشنر انعام الله وزیر، ویلي چې د لوی اختر د رخصتیو له پای ته رسېدو وروسته د تورخم دروازه یو ځل بیا افغانستان ته د ستنېدونکو کډوالو او کورنیو پر مخ پرانیستل شوې او د بېرته ستنېدو بهیر عادي حالت ته ګرځېدلی دی.
د نوموړي په وینا، هغه موټر چې افغان کډوال لېږدوي او همدارنګه تش موټر چې له افغانستان نه بېرته پاکستان ته ستنېږي، خپل عادي تګ راتګ پیل کړی دی. هغه زیاته کړې چې د اړوندو ادارو تر څارنې لاندې د افغان کډوالو د بېرته ستنولو لړۍ په منظم ډول روانه ده.
انعام الله وزیر ویلي چې د لوی اختر د رخصتیو له امله د مې له ۲۶مې تر ۲۹مې نېټې پورې د تورخم دروازه د ستنېدونکو کډوالو پر مخ تړل شوې وه او د بېرته ستنېدو بهیر د څلورو ورځو لپاره ځنډېدلی و.
دا په داسې حال کې ده چې د تورخم دروازه له نږدې یو کال راهیسې د ترانزیټي او عادي تګ راتګ پر مخ تړلې ده، خو له شاوخوا درېیو میاشتو راهیسې یوازې د افغان کډوالو د بېرته ستنولو لپاره له یوه لوري خلاصه ده.
بلخوا، یو شمېر افغان کډوال د بېرته ستنولو د اوږدو اداري پړاوونو او د لنډي کوتل په کمپ کې د اسانتیاوو د نشتوالي په اړه پرلهپسې شکایتونه کوي.