د جمهوریت پر مهال د افغانستان د کانونو او پټرولیم وزیره نرګس نهان وايي، افغانستان تر هر څه وړاندې داسې دفاعي او سیاسي نظام ته اړتیا لري چې هېڅ ډلې ته د زور له لارې د واک د نیولو اجازه ورنه کړي او د ټولو افغانانو استازیتوب وکړي.
نوموړې په خپلې ایکسپاڼه کې لیکلي چې افغانستان یوه ټولشموله، ولسواکه او د وګړو پر محور ولاړ نظام ته اړتیا لري، داسې نظام چې حکومت یې د خلکو په رایو ټاکل شوی وي او لومړیتوبونه یې د امنیت ټینګښت، خلکو ته د خدمتونو وړاندې کول، د طبیعي سرچینو منظم مدیریت او له سیمهییزو هېوادونو سره د سولهییزو اړیکو ساتل وي.
نهان ټینګار کړی چې هېواد داسې رهبرۍ ته هم اړتیا لري چې د ښځو د بشري او مدني حقونو د بېرته اعادې ترڅنګ، هغوی د هېواد د یوې مهمې پانګې په توګه وګڼي او د زدهکړو، لوړو زدهکړو، ظرفیت لوړونې او په دولتي او ټولنیزو چارو کې د ګډون زمینه ورته برابره کړي.
هغې همداراز ویلي چې د افغانستان قومي، ژبني، مذهبي، فرهنګي او فکري تنوع ته باید درناوی وشي، ځکه د هغې په وینا، همدغه تنوع د افغانستان ښکلا او شتمني جوړوي.
د کانونو او پټرولیم پخوانۍ وزیرې په خپلو څرګندونو کې د داسې نظام او حکومت غوښتنه کړې چې د خلکو د ارادې پر بنسټ رامنځته شوی وي او د هېواد د ثبات، پرمختګ او ملي یووالي لپاره کار وکړي.
