اوکراین د روسیې په سوېل کې د تېلو پر تاسیساتو بریدونه کړي دي
د روسیې د سوېل د روستوف او کراسنودار سیمو سیمهییزو چارواکو ویلي، چې اوکرایني بېپيلوټه الوتکو تېره شپه د روسیې په تاګانروګ بندر کې د تېلو یو ټانکر ویشتلی او د دغه هېواد د ارماویر ښار په یوه بله برخه کې یې د تېلو یوه زېرمه هم په نښه کړې ده.
د روستوف سیمې والي یوري سلیوسار د شنبې په ورځ، پهخپل ټیلیګرام چینل کې لیکلي، چې د تاګانروګ بندر پر ټانکر لګېدلی اور په بشپړ ډول مړ شوی دی. دغه ښار چې شاوخوا ۲۴۰ زره نفوس لري، چارواکو پکې د تېلو د تویېدو یا د سمندر د ککړېدو راپور نه دی ورکړی، خو د والي په وینا پهدې برید کې دوه کسان ټپیان شوي دي.
په ورته مهال د دغه ښار ښاروالې سویټلانا کامبولوا ویلي، چې په سیمه کې د مې پر ۲۷مه نېټه لګول شوی سیمهییز بېړنی حالت د دغو پېښو له امله نور هم غځول شوی دی.
بل لور ته، په ګاونډي ولایت کراسنودار کې د ارماویر» ښار سیمهییزو چارواکو ویلي، چې د دغه ښار په صنعتي زون کې د تېلو په یوه ډیپو کې لګېدلی اور اوسمهال تر کنټرول لاندې راوړل شوی او په دې پېښه کې چا ته ځاني زیان نه دی اوښتی.
د روستوف والي یوري سلیوسار زیاته کړې، چې د دغه ولایت په کچه نږدې ۵۰ اوکرایني بېپيلوټه الوتکې د دفاعي ځواکونو له لوري رانسکورې شوې دي. د دغو بریدونو راپورونه په ټوله ولایت کې ورکړل شوي دي؛ دا هغه ولایت دی چې د اوکراین له ډونباس سیمې سره ګډه پوله لري او اوسمهال د روسیې او اوکراین ترمنځ د سختو جګړو اصلي مرکز ګڼل کېږي.
