د نورستان په مرکز پارون کې ځايي اوسېدونکو افغانستان انټرنشنل- پښتو ته ویلي، چې د اختر په ورځو کې په دغه ولایت کې سېلانیانو هوایي ډزې کړې دي. د معلوماتو لهمخې، د پارون اړوند اشټیوي کلي کې د دې ډزو له کبله یو کس هم وژل شوی دی.
د نورستان اوسېدونکي وایي، د شنبې په ورځ (د غبرګولي ۹مه) د زینالاسلام په نوم یو ځایي اوسېدونکی چې خپل کور کې پر کار بوخت وو، په یوې هوایي مرمۍ ولګېد او ځای پر ځای یې ساه ورکړه.
د اشټیوي کلي اوسېدونکو غوښتنه کړې، چې د مېلو په ورځو کې نورستان ته ورتلونکي سېلانیان باید له وسلو سره پرېنښودل شي.
یوه ځایي اوسېدونکي وویل: «زموږ خلک سخت ژوند شرایط لري، موږ غرونو او بانډو کې شپه او ورځ کار کوو او دغه بې احتیاطه ډزې کولای شي چې د خلکو په کورونو کې غمونه جوړ کړي».
په خواله رسنیو کې هم یو شمېر ویډیوګانې لاس په لاس کېږي چې پهکې لیدل کېږي د نورستان پارون کې سېلانیان سختې ډزې کوي او هر لوري څخه د مرمیو غږونه اورېدل کېږي.
د نورستان اوسېدونکو نیوکه کړې، چې د دوی عامه نظم خراب شوی او طالبانو بیا د دغو ګډوډیو هېڅ راز مخنیوی نهدی کړی. تر دې وړاندې هم د طالبانو په واکمنۍ کې د اخترونو پر مهال سېلانیانو نورستان کې دا ډول کړنې کړي او نیوکې دا دي چې د دغو پېښو په تکرار سره سره بیا هم ځايي ادارې د مخنیوي لپاره هېڅ راز اقدامات نهدي کړي.
د سرچینو په وینا، په ټول هېواد کې وسلې یوازې له طالبانو سره دي او بل څوک د وسلې د ساتنې، لېږدونې او کارونې اجازه نهلري.
