په سمنګان ولایت کې د طالبانو د بدني روزنې او سپورټ امریت وايي چې د غیږنیونې په یو ورځنیو سیالیو کې د کندز، بغلان، جوزجان، بلخ او سمنګان ولایتونو ۶۰ ورزشکارانو ګډون کړی و. سمنګان په دغو سیالیو کې بریالی ولایت اعلان شوی.
د طالبانو تر کنترول لاندې د المپیک، بدني روزنې او سپورټ عمومي ریاست وايي، چې په سمنګان ولایت کې د پنځو ولایتونو د ۶۰ ورزشکارانو ترمنځ د کورش یا غېږنیونې یو ورځنۍ سیالۍ شوې دي.
د چارواکو په وینا، په دغو سیالیو کې پر کوربه ولایت سمنګان سربېره د کندز، بغلان، جوزجان او بلخ ولایتونو څخه راغلو ورزشکارانو برخه اخیستې وه او د یوې ورځې لپاره یې یو بل سره د غېږنیونې سیالۍ وکړې.
په دغو ترسره شویو سیالیو کې د سمنګان ولایت ورزشکارانو وکولای شول چې لومړی مقام خپل کړي او د اتلولۍ جام وګټي.
دغه راز د کندز ولایت ورزشکارانو دویم او د بغلان ولایت غېږنیوونکو درېیم مقام ترلاسه کړ.
د طالبانو المپیک او سپورټ ریاست وایي چې د دغو سیالیو موخه د یادې ورزشي رشتې وده او د ولایتونو ترمنځ د ورزشکارانو همغږي وه.
د دغو سیالیو په پای کې غوره ورزشکارانو ته جایزې او ستاینلیکونه هم ورکړل شول.
