ایمل ولي خان: دین د انسان او خالق ترمنځ شخصي اړیکه ده او هېڅوک یې د انحصار حق نه لري
د عوامي نېشنل ګوند مشر اېمل ولي خان وايي، دین د انسان او د هغه د خالق ترمنځ شخصي اړیکه ده او هېڅوک د دین د انحصار یا مطلق واک ادعا نه شي کولای. نوموړي دا څرګندونې د «رښتیا رښتیا دي»په نوم د خپلې نوې پوډکاسټ خپرونې په اړه د تبصرو پر مهال کړې دي.
اېمل ولي خان ویلي، «دا څه چې اوس روان دي، باور وکړئ چې دا لا هېڅ هم نه دي. کله چې زه خپله مخې ته راشم او په خپرونه کې د تاریخ هغه پټ فصلونه راوسپړم چې کلونه، کلونه یې د پټ ساتلو هڅې شوې دي، نو د ډېرو خلکو لپاره به یې زغمل اسانه نه وي.»
هغه په خپلو څرګندونو کې ټینګار کړی: «دین د انسان او د هغه د خالق ترمنځ شخصي اړیکه ده، او هېڅوک په دې برخه کې د انحصار یا واک ادعا نه شي کولای. موږ ټول به د الله تعالی پر وړاندې په جلا توګه د خپلو کړنو ځواب ورکوو، نو د نورو د ایمان پر ځای د خپلو اعمالو او چلند په اړه فکر وکړئ.»
نوموړي په دې وروستیو کې د«ریښتیا ريښتیا دي» په نوم د پوډکاسټ خپرونه پیل کړې او ویلي یې دي چې د دې پلیټفارم موخه د پښتنو د اصلي تاریخ په اړه د متخصصینو نظرونه عامو خلکو ته رسول دي.
هغه زیاته کړې چې له دې پلیټفارم څخه به د پښتنو د تاریخ، سیاسي حقایقو، بې پرې شننو او د ورځنیو حالاتو پر بنسټ پروګرامونه خپرېږي.
