خیبر پښتونخوا:شمالي وزیرستان کی امنيتي وضعیت له امله ګرځبندیز اعلان شوی
د خیبر پښتونخوا د شمالي وزیرستان ولسوالۍ ادارې اعلان کړی چې د مې میاشتې په ۳۰مه او ۳۱مه نېټه (شنبه او یکشنبه) به په سیمه کې ګرځبندیز وي.
د شمالي وزیرستان مرستیال کمېشنر ویلي، د ګرځبندیز پر مهال به د ولسوالۍ ټولې داخلي او خارجي لارې د ولسي تګ راتګ پر مخ تړلې وي.
د نوموړي په وینا، د خلکو د اسانتیا لپاره به هره ورځ د ماښام له شپږو بجو څخه د شپې تر لسو بجو پورې په ګرځبندیز کې لنډمهاله نرمي راوستل کیږي.
ځايي چارواکو ویلي، د ګرځبندیز له امله به ټولې لویې لارې د عامو موټرو او ترافیکو پر مخ تړلې وي. له همدې امله یې له اوسېدونکو غوښتي چې د ټاکل شویو وختونو درناوی وکړي او په خپلو کورونو کې پاتې شي.
بلخوا، د ولسوالۍ چارواکو د ګرځبندیز د پلي کېدو رسمي خبرتیا هم خپره کړې ده.
د یادونې وړ ده چې شمالي وزیرستان او سويلي وزیرستان کې امنیتي وضعيت ورځ تر بلې په خرابېدو دی.
