د ایران د بهرنیو چارو وزیر سید عباس عراقچي، ویلي چې له امریکا سره خبرې اترې او د پیغامونو تبادله لا هم روانه ده او تر هغه چې کومې مشخصې پایلې ته ونه رسېږي، په اړه یې قضاوت نه شي کېدای.
عراقچي د یکشنبې په ورځ د ایران دولتي راډیو او ټلوېزیون (صدا و سیما) سره په خبرو کې وویل: «خبرې اترې او د پیغامونو تبادله روانه ده، او تر هغه چې یوې څرګندې پایلې ته ونه رسېږي، د هغې په اړه قضاوت کول ممکن نه دي».
نوموړي زیاته کړه چې اوس مهال مطرح کېدونکې ډېری خبرې او راپورونه یوازې اټکلونه دي او تر هغه چې رسمي او قطعي بڼه ونه لري، باید ورته ډېر ارزښت ورنه کړل شي.
د ایران د بهرنیو چارو وزیر وویل: «هر څه چې اوس ویل کېږي، یوازې ګومانونه او اټکلونه دي او تر هغه چې یقیني نه شي، باید پرې تکیه ونه شي.»
د عراقچي دغه څرګندونې په داسې حال کې مطرح کېږي چې د ایران د روانو ډیپلوماټیکو تماسونو او احتمالي مذاکراتو په اړه بېلابېل راپورونه او اټکلونه خپرېږي، خو تهران لا هم د هر ډول احتمالي پایلو په اړه له احتیاطه کار اخلي.
