د روغتیا نړیوال سازمان: په نړۍ کې ۷۵۰ میلیونه انسانان د تنباکو پرېښودلو هیله لري
د ملګرو ملتونو د روغتیا نړیوال سازمان د تنباکو ضد نړیوالې ورځې په مناسبت ویلي، نږدې ۶۰ سلنه د تنباکو کاروونکي د دې عادت پرېښودو هیله لري، چې شمېر یې په نړۍ کې شاوخوا ۷۵۰ میلیونو کسانو ته رسېږي.
دغه سازمان ټینګار کړی چې د مناسب ملاتړ په ترلاسه کولو سره د تنباکو پرېښودل ممکن دي او د انسان پر روغتیا ژورې مثبتې اغېزې لري.
دغه سازمان د تنباکو ضد نړیوالې ورځې په مناسبت په خپل ایکسپاڼه کې له خلکو غوښتي چې د تنباکو له کارولو لاس واخلي او د روغ ژوند لپاره ګام پورته کړي.
یاد سازمان ویلي چې په نړۍ کې نږدې ۶۰ سلنه د تنباکو کاروونکي غواړي دا عادت پرېږدي. د سازمان په وینا، دا شمېر شاوخوا ۷۵۰ میلیونه کسانو ته رسېږي.
د روغتیا نړیوال سازمان په خپل پیغام کې ویلي: «د مناسب ملاتړ په ترلاسه کولو سره تاسو کولی شئ د تنباکو پرېښودو هیله په حقیقت بدله کړئ.»
سازمان د تنباکو پرېښودو روغتیايي ګټې هم یادې کړې او ویلي یې دي چې له پرېښودو یوازې شل دقیقې وروسته د زړه درزا راټیټېږي، د دوو تر دولسو اوونیو په موده کې د سږو فعالیت ښه کېږي او له یوه کال وروسته د زړه د ناروغیو خطر نږدې نیمایي ته کمېږي.
د روغتیا نړیوال سازمان ټینګار کړی چې د تنباکو اعتیاد ماتېدای شي او د هغو کسانو لپاره چې غواړي دا عادت پرېږدي، بېلابېل روغتیايي او مشورتي خدمتونه شته.
د تنباکو ضد نړیواله ورځ هر کال د مې پر ۳۱مه لمانځل کېږي او موخه یې د تنباکو د زیانونو په اړه د عامه پوهاوي لوړول او د تنباکو د استعمال د کمولو لپاره د خلکو هڅول دي.
