اکسیوس: په لبنان کې د اوربند لپاره د امریکا نوې هڅه ناکامه شوه

یوه امریکایي چارواکي اکسیوس ته ویلي: «امریکا له اسراییل نه تمه نه‌لري، چې د یوه ترهګریز سازمان له‌خوا د خپلو ملکي وګړو پر وړاندې دوامداره بریدونه وزغمي».
دا په داسې حال کې ده، چې د اسراییل پوځ په لبنان کې پر ملیخ او کفرحون ښارونو د بریدونو خبرداری ورکړی او د یادو سیمو له اوسېدونکو یې غوښتي، چې سملاسي خپل کورونه پرېږدي او له سیمې ووځي.
ورته مهال الجزیرې راپور ورکړی، چې د لبنان په سویل کې د نښتې پرمهال یو اسراییلی پوځي‌ وژل شوی او درې نور ټپیان شوي دي. له بل پلوه د اسراییل لومړي وزیر بنیامین نتنیاهو هم اعلان کړی، چې پوځ ته یې د بیروت په سویلي څنډو کې پر اهدافو د برید امر کړی دی.
د اسراییل دفاع وزیر یسرایل کاټز هم ټینګار کړی، چې نتنیاهو او هغه پوځ ته د بیروت په څنډو کې د هدفونه په نښه کولو امر کړی دی.