فاکسنیوز: مجتبی خامنهيي په منځني ختیځ کې د امریکا پر وړاندې د یوې ټلوالې جوړولو هڅه کوي
د فاکسنیوز د راپور له مخې؛ مجتبی خامنهيي د ډونالډ ټرمپ د هغو هڅو په غبرګون کې چې غواړي د ابراهیم تړون پراخ کړي، په منځني ختیځ کې د امریکا تر مشرۍ لاندې نړۍوال نظم پرضد د یوې سیمهییزې ټلوالې جوړولو هڅه کوي.
ویل کېږي، چې هغه غواړي د «نوي اسلامي تمدن» تر شعار لاندې د سیمې هېوادونه سره راټول کړي. په راپور کې راغلي، د ایران مشر مجتبی خامنهيي د امریکا د نفوذ پر وړاندې یو سیاسي او ایډیولوژیک کمپاین پیل کړی او هڅه کوي چې د سیمې هېوادونه د تهران تر مشرۍ لاندې اسلامي همغږۍ او یووالي ته وهڅوي.
راپور زیاتوي، د تهران وروستي اقدامات یوازې څو ساعته وروسته له هغه پیل شول چې ټرمپ د سعودي عربستان، متحده عربي اماراتو، قطر، ترکیې، پاکستان، مصر، اردن او بحرین له مشرانو سره د ابراهیم تړون د پراختیا په اړه بحث وکړ. ټرمپ (د مئ ۲۵مه) پر ټروت خواله رسنۍ د دغه تړون د پراختیا ملاتړ هم وکړ.
د فاکسنیوز په وینا؛ یوه ورځ وروسته مجتبی خامنهيي ته منسوب یو پیغام پر اېکس پاڼه خپور شو، چې پهکې د «نوي اسلامي تمدن» د جوړېدو غوښتنه شوې وه او له اسلامي دولتونو غوښتل شوي وو چې د اسلامي امت د پرمختګ او د اسلامي نړۍ د ستونزو د حل لپاره له یو بل سره همکاري وکړي.
