د طالبانو تر چتر لاندې د پېښو پر وړاندې د مبارزې او چمتووالي ادارې خبرداری ورکړی چې د هېواد په ۱۲ ولایتونو کې د نسبتا سختو بارانونو، تالندې او سېلابونو د راوتلو احتمال شته. دغې ادارې له خلکو غوښتي چې د سیندونو او هغو سیمو ته له نږدې کېدو ډډه وکړي چې د سېلابونو له ګواښ سره مخ دي.
دغه ادارې په یوه خبرتیا کې ویلي چې د ترانسپورټ او هوايي چلند وزارت د هواپېژندنې ریاست او نړیوالو معتبرو بنسټونو د وړاندوینو له مخې، په پروان، پنجشېر، بامیان، غور، خوست، بلخ، سمنګان، سرپل، بغلان، تخار، بدخشان او ننګرهار ولایتونو کې د نسبتاً شدیدو بارانونو، دوړو، تالندې او برېښنا او ناڅاپي سېلابونو د راوتلو احتمال شته.
د خبرتیا له مخې، په یادو ولایتونو کې د باران اندازه له ۱۰ تر ۲۰ میلیمترو پورې اټکل شوې ده.
ادارې له اوسېدونکو غوښتي چې د سیندونو، خوړونو او هغو سیمو ته له تګ څخه ډډه وکړي چې د سېلابونو د راوتلو خطر پکې موجود دی او د پېښو پر وړاندې د مبارزې د ولایتي کمېټو له سپارښتنو سره سم اړین احتیاطي تدابیر ونیسي.
همدارنګه، د پېښو پر وړاندې د مبارزې او چمتووالي ادارې ویلي چې د دې ادارې عمومي رییس ټولو ولایتي مسوولانو او کارکوونکو ته سپارښتنه کړې چې د احتمالي زیانونو د مخنیوي لپاره په بشپړ چمتووالي او خبرداریز حالت کې واوسي.
افغانستان هر کال د پسرلي او اوړي په موسمونو کې د سختو بارانونو او ناڅاپي سېلابونو شاهد وي، چې له امله یې خلکو ته مالي او ځاني زیانونه اوړي.
