د ایران پوځ د اسراییل تر واک لاندې شمالي سیمو خلکو ته د سیمې د تخلیې خبرداری ورکړی
د ایران د خاتمالانبیا مرکزي قرارګاه چارواکو د اسراییل تر کنټرول لاندې شمالي سیمو او پوځي ښارګونو اوسېدونکو ته خبرداری ورکړی چې د اوربند د تکراري نقض په صورت کې به وضعیت لا خطرناک شي.
د یادې قرارګاه قوماندان عبداللهي ویلي، چې که اسراییل د اوربند ماتولو ته دوام ور کړي، د اشغال شویو سیمو په شمالي برخو او نظامي ښارګوټو کې مېشتو خلکو ته خبرداری ورکوي چې د احتمالي زیان د مخنیوي لپاره له دغو سیمو ووځي.
هغه زیاته کړه چې دا خبرداری د اوسني وضعیت د جدي والي له امله ورکول کېږي او د وضعیت د هر ډول احتمالي کړکېچنېدو مسوولیت به د مقابل لوري پر غاړه وي.
