ځایي اوسېدونکي: د سېلابونو له امله د تخار- بدخشان لارو تړل پاتې کېدو ګڼې ستونزې جوړې کړې
د شمال ختیځ سیمو اوسېدونکي وایي، د وروستیو سېلابونو له امله د تخار-بدخشان لويې لارې ځینې برخې تړل شوې چې له امله یې ټرافیکي ګڼه ګوڼه زیاته کړې او پر دغه لارو تلونکو کسانو ته یې ګڼې ستونزې جوړې کړې دي.
د یادو سیمو یوشمېر اوسېدونکو افغانستان انټرنشنل ته په لېږلو ویدیو او غږونو کې ویلي، له یوې اونۍ زیاته موده کېږي چې د یادې لارې یوشمېر تړل شړې برخې د تګراتګ لپاره نهدي پرانیستل شوې.
د دوی په وینا؛ د اختر په ورځو کې د موټرو ګڼه ګوڼه دومره زیاته شوې، چې د یو ساعت مزل په څو ساعتونو کې وهي. د تخار یو اوسېدنکي افغانستان انټرنشنل ته ویلي: «خلک د اختر په ورځو کې ساعتونه، ساعتونه پر سړک بند پاتې وو او ګڼې کورنۍ ونه توانېدې، چې پر وخت د خپلو خپلوانو لیدنې او کتنې ته ورسېږي. اختر د خلکو لپاره ډېر خوندور نه شو تېر».
د سیمې اوسېدونکي وایي، چې د اختر پرمهال د تخار او بدخشان ولایتونو ترمنځ تګراتګ زیات وي؛ خو د وروستیو سېلابونو له امله د لویې لارې د یوې برخې تړل کېدو مساپر او موټرچلوونکو ته ستونزې جوړې کړې دي.
