اسراییلي پوځ د لبنان پر ځینو ښارونو د بریدونو خبرداری ورکړی
د اسراییل پوځ په لبنان کې پر ملیخ او کفرحون ښارونو د بریدونو خبرداری ورکړی او د یادو سیمو له اوسېدونکو یې غوښتي، چې سملاسي خپل کورونه پرېږدي او له سیمې ووځي. ورته مهال الجزیرې راپور ورکړی، چې د لبنان په سویل کې د نښتې پرمهال یو اسراییلی پوځي وژل شوی او درې نور ټپیان شوي دي.
دا په داسې حال کې ده چې د ملګرو ملتونو د ماشومانو ملاتړ صندوق (یونېسف) پر لبنان د اسراییل د بریدونو په غبرګون ویلي، چې تېره اوونۍ په لبنان کې په منځني ډول په هرو ۲۴ ساعتونو کې ۱۱ ماشومان وژل شوي یا ټپیان شوي دي.
د یادې ادارې د معلوماتو له مخې؛ د اپرېل پر ۱۶مه د اوربند له پیل راهیسې تراوسه پورې ۵۵ ماشومان وژل شوي او ۲۱۲ نور ټپیان شوي دي. بل لور ته د ملګرو ملتونو د روغتیا نړۍوال سازمان هم د جمعې په ورځ خبرداری ورکړی و، چې د پوځي فعالیتونو د پراختیا ګواښ د لبنان د خلکو لپاره د روغتیا په برخه کې سختې اندېښنې راپارولې دي.
