د بلوچستان په بېلابېلو سیمو کې په جلا، جلا پېښو کې اووه کسان وژل شوي او نهه نور ټپيان دي
د بلوچستان په بېلابېلو سیمو کې د تاوتریخوالي په جلا، جلا پېښو کې لږترلږه اووه کسان وژل شوي او نهه نور ټپیان دي. د عبدالله کلا ولسوالۍ د ټراما روغتون د معلوماتو له مخې؛ د مېزۍ اډې نادرا مارکېټ ته نږدې د ډزو په یوه پېښه کې پنځه کسان وژل شوي او دوه نور ټپيان دي.
بلخوا د بلوچستان د نصیراباد ولسوالۍ د ډېره مراد جمالي ښار اړوند سیمه کې ناپېژاندو وسلهوالو موټرسایکل سپرو دوه وروڼه په ډزو وژلي دي. د پولیسو په وینا؛ پېښه د صدر تاڼې په سیمه کې د جمالي ملي لویې لارې پر سر رامنځته شوې ده.
وسلهوالو پر دواړه وروڼو ډزې کړې او خپله له سیمې تښتېدلي دي. پولیسو د پېښې دوسیه ثبت کړې او د بریدګرو د نیولو لپاره یې پلټنې پیل کړې دي.
همداراز د خضدار ولسوالۍ د خیراوه په سیمه کې د دوو ډلو ترمنځ د شخړې له امله اووه کسان ټپیان شوي دي. ځايي سرچینې وایي، په ټپیانو کې ځینې کسان سخت ژوبل دي او د درملنې لپاره روغتون ته لېږدول شوي دي.
د دغه درېیو پېښو د انګېزو او لاملونو په اړه لاتراوسه رسمي څرګندونې نهدي شوې؛ خو پولیس وایي، چې په اړه یې څېړنې او د ښکېلو کسانو د پېژندلو لپاره پلټنې روانې دي.
