عباس عراقچي د اوربند د دوام لپاره د پاکستان د هڅو غوښتنه وکړه
د پاکستان د بهرنیو چارو وزارت خبر ورکړی، چې د دغه هېواد د بهرنیو چارو وزیر محمد اسحاق ډار او د ایران د بهرنیو چارو وزیر عباس عراقچي د ټیلیفون په کرښه د «سیمې روان وضعیت او د تازه پرمختګونو» په اړه خبرې کړې دي.
د پاکستان د بهرنیو چارو وزارت پر اېکس پاڼه راغلي، چې عراقچي «په سیمه کې د وروستیو بدلونونو او په ځانګړې توګه په لبنان کې د اسراییل لهخوا د اوربند پر سرغړونې او د بیروت په ځینو برخو د احتمالي بریدونو په اړه جدي اندېښنه څرګنده کړې ده».
د راپور له مخې؛ هغه له پاکستان نه غوښتي، چې د روان تاوتریخوالي د کمولو او د اوربند د ساتلو لپاره خپلو هڅو ته دوام ورکړي. له بله پلوه د لبنان په پارلمان کې د حزبالله استازي حسن فضلالله ویلي، چې د لبنان په ټوله خاوره کې د بشپړ اوربند د ټینګښت ملاتړ کوي.
د رویټرز خبري اژانس د راپور له مخې؛ نوموړي ټینګار کړی چې حزبالله د جګړو د درولو او د لبنان د امنیت د ټینګښت لپاره د بشپړ اوربند له هر ډول هڅو ملاتړ کوي.
