پخواني افغان نظامیان: د جمهوري نظام د دورې پاتې معاشونه لا هم نه دي راکړل شوي
یو شمېر پخوانیو افغان نظامیانو افغانستان انټرنشنل پښتو ته په خپلو رالیږلو پیغامونو کې ادعا کړې، چې د جمهوري نظام له سقوط وړاندې د دوی د څو میاشتو پاتې معاشونه حواله شوي وو، خو د حکومت له سقوط وروسته تر اوسه نه دي ورکړل شوي.
دوی وایي، شاوخوا لس تنه پخواني نظامیان دي او د شپږو میاشتو معاشونه یې پاتې دي او د هر یوه د معاش اندازه نږدې ۱۲۰ زره افغانۍ ته رسېږي.
د دوی په وینا، د طالبانو له واکمنېدو وروسته اړوند وچارواکو د معاشونو د ورکولو لپاره د دوی عریضې راټولې کړې او د معاشونو د اجرا ژمنه ورسره شوې وه.
د دغو پخوانیو نظامیانو په وینا، له ژمنو سره سره تر اوسه هېڅ عملي اقدام نه دی شوی او د معاشونو ورکولو په اړه روښانه معلومات نه شته.
دوی ادعا کوي چې نږدې یو کال وړاندې هم د طالبانو حکومت له لوري د معاشونو ورکولو ژمنه تکرار شوې وه، خو لا هم نه ده پوره شوې.
