افغان لوبغاړی احمدسهیل جعفري به (د چنګاښ په ۱۷مه) د اتلولۍ کمربند ګټلو لپاره د پاکستان له عظیم خان سره مخ شي. دغه لوبه به د «اېنفېنیټ» اتلولۍ په ۷۰ کیلوګرامه وزن کې د پاکستان د اسلاماباد په لیاقت لوبغالي کې ترسره شي.
د «اېنفېنیټ چمپیونشېپ» سازمان دغه لوبه تر عادي سیالیو لویه بللې ده. عظیم خان چې د «ټياېفاېف» اسلاماباد کلب استازیتوب کوي، دغه سیالۍ ته له ۱۵ بریاوو او ۳ ماتو سره ننوځي.
له بلې خوا افغان لوبغاړی احمد سهیل جعفري له ۱۲ بریاوو او ۲ ماتو سره دغه سیالۍ ته ننوځي.
هغه د افغانستان د رزمي هنرونو یو له غوره استعدادونو ګڼل کېږي او اوس فرصت لري، چې د دغه تاریخي لقب په ګټلو سره د یادو سیالیو په تاریخ کې خپل نوم ثبت کړي.
