د طالبانو د کور او ښار جوړونې وزارت وایي، چې په ننګرهار، فراه، فاریاب او هلمند کې یې پر ۱۲۴۱ کډوالو کورنیو استوګنیزې نمرې وېشلې دي. د یاد وزارت په وینا؛ له دې ډلې ۵۸۴ استوګنیزې نمرې په ننګرهار، ۳۹۷ په فاریاب، ۱۳۳په فراه او ۱۲۷ په هلمند ولایت کې پر راستنو شویو کورنیو وېشل شوې دي.
دغه وزارت زیاتوي، چې تر دې مهاله په ټول هېواد کې ۳۶زره او ۹۶۰ راستنېدونکو کورنیو ته استوګنیزې نمرې ورکړل شوې دي. نوموړي وزارت وړاندې ویلي، د استوګنیزو نمرو د وېش بهیر د یوه منظم پلان له مخې پر مخ وړل کېږي او موخه یې راستنېدونکو کورنیو ته د دایمي استوګنې زمینې برابرول او د هغوی د ژوند د شرایطو ښه کول دي.
له بل پلوه ملګري ملتونه وايي، چې له ۲۰۲۳کال راهیسې نږدې ۶ مېلیونه کډوال افغانستان ته ستانه شوي دي. د ملګرو ملتونو د اټکل له مخې؛ تمه کېږي چې د روان کال تر پایه به ۳ مېلیونه نور افغانان هم افغانستان ته ستانه شي.
خو د طالبانو د خپرو شویو شمېرو له مخې؛ له دې ډلې پر یوازې ۳۶زره او ۹۶۰ کډوالو کورنیو ځمکې وېشل شوې دي.
سره له دې چې طالبانو افغانستان ته د بېرته ستنېدونکو کډوالو لپاره په ځینو ولایتونو کې د اوسېدو ځانګړي پنډغالي او ښارګوټي جوړ کړي؛ خو تازه ستانه شوي کډوال له بېکارۍ او د سرپناه له نشتوالي شکایت کوي او ځینې کسان هڅه کوي بېرته پر ناقانونه لارو له هېواده ووځي.
