په تخار کې د طالبانو د ټولګټو چارو ریاست خبر ورکړی، د تخار ـ بدخشان عمومي لویه لاره چې د سېلابونو له امله تړل شوې وه؛ بېرته د تګراتګ لپاره پرانیستل شوه. د دغه ریاست په وینا؛ د یادې ادارې تخنیکي ډلې دغه لاره د تګراتګ لپاره پرانیستې ده.
دغه ریاست وایي، د پاکولو او رغنیزو چارو له بشپړېدو وروسته د بنګي، اشکمش، نمکاب، فرخار، ورسج، کلفګان او رستاق ولسوالیو پر لور د وسایطو تګراتګ بېرته عادي حالت ته راګرځېدلی او د سیمې د اوسېدونکو ترانسپورټي ستونزې حل شوې دي.
یاد ریاست زیاتوي، د سېلابونو له امله تړل شوې نورې لارې او لویې لارې هم تر کار لاندې دي او هڅې روانې دي چې پاتې سړکونه په لنډ وخت کې د تګراتګ لپاره پرانیستل شي.
تر دې وړاندې د شمال ختیځو سیمو اوسېدونکو شکایت کړی و، د وروستیو سېلابونو له امله د تخار-بدخشان لويې لارې ځینې برخې تړل شوې چې له امله یې ټرافیکي ګڼه ګوڼه زیاته شوې او پر دغه لاروهتلونکو کسانو ته یې ګڼې ستونزې جوړې کړې دي.
د یادو سیمو یوشمېر اوسېدونکو افغانستان انټرنشنل ته په لېږلو ویدیو او غږونو کې ویلي وو، له یوې اونۍ زیاته موده کېږي چې د یادې لارې یوشمېر تړل شوې برخې د تګراتګ لپاره نهدي پرانیستل شوې.
