یو پخوانی افغان خبریال عبدالمعید هاشمي د اقتصادي ستونزو او وزګارتیا له امله اوس د کابل پر سړک اوبه او هندواڼې پلوري. نوموړي له خلکو غوښتي: « لویه مرسته به مو دا وي، چې یو بوتل اوبه او هندواڼه رانه واخلئ! ستاسو به ثواب وشي او زما د اولادونو نفقه!»
هغه پر فېسبوک پاڼه کابل مېشتو ته په یوه پيغام کې ویلي: « که د کابل د قلعه زمان خان- ارزان قیمت او احمدشاه بابا مینې پر سرک تېرېږئ؛ نو له ما سره دمه او خواله کوئ». هغه چې د سړک پر غاړه اوبه او هندواڼې پلوري کاږلي، دوه ورځې کېږي چې د یخ پیسې هم نهشي برابرولی او ښاروالی ورڅخه د یو متر پر سر ۶۰ افغانۍ اخلي.
څه موده مخکې یوشمېر فرهنګپالو نوموړي ته د کار موندنې او مالي مرستو د ټولولو کمپاین هم پيل کړی و. د سیفالرحمان نیازي په نوم یو کس پر فېسبوک پاڼه د هاشمي له انځور سره لیکلي: «دغه سړی حقدار او ناچاره دی! هيله ده يو څوک ورسره د دندې پيدا کولو کې همکاري وکړي. هغه د پښتو، دري او هر ډول متن جوړولو، اداري کار، عامه پوهاوي، ژورنالیزم، ادبیاتو، حقوقو، اسلامیاتو، صنعت او سوداګرۍ کې دېرش کلنه کاري تجربه لري».
نورو تبصره کوونکو هم د نوموړي ملاتړ کړی، د رسنیو پر ملاتړو بنسټونو او واکمنو طالبانو یې غږ کړی، چې د هغه لاسنیوی وکړي.
