پر لبنان د اسراییل په ډرون برید کې د دوو ماشومانو په ګډون درې کسان وژل شوي
د لبنان دولتي خبري اژانس (NNA) راپور ورکړی، چې پر سویلي لبنان د اسراییل په ډرون برید کې د دوو ماشومانو په ګډون درې کسان وژل شوي دي. د راپورونو له مخې؛ اسراییل د لبنان په سویل کې پر بېلابېلو سیمو بریدونه کړي دي.
له بل پلوه د ایران د بهرنیو چارو وزیر عباس عراقچي د پاکستان د بهرنیو چارو له وزیر اسحاق ډار سره د ټیلیفون په کرښه خبرو کې «په سیمه کې د وروستیو بدلونونو او په ځانګړې توګه په لبنان کې د اسراییل لهخوا د اوربند پر سرغړونې او د بیروت په ځینو برخو د احتمالي بریدونو په اړه اندېښنه څرګنده کړې ده».
له بله پلوه د لبنان په پارلمان کې د حزبالله استازي حسن فضلالله ویلي، چې د لبنان په ټوله خاوره کې د بشپړ اوربند د ټینګښت ملاتړ کوي. د رویټرز خبري اژانس د راپور له مخې؛ نوموړي ټینګار کړی چې حزبالله د جګړو د درولو او د لبنان د امنیت د ټینګښت لپاره د بشپړ اوربند له هر ډول هڅو ملاتړ کوي.
