یو افغان: زوی مې د طالبانو په زندان کې تر شکنجې لاندې اعتراف ته اړ اېستل شوی
یو افغان افغانستان انټرنشنل ته په دغه لېږلي غږیز پیغام کې وايي، چې د طالبانو په زندانونو کې شکنجه دوام لري. هغه وايي، چې زوی یې له څه مودې راهیسې د طالبانو په زندان کې دی او له سختو شکنجو او جبري اعترافونو سره مخ شوی دی.
دغه افغان په خپل لېږلي پیغام کې ویلي، چې د طالبانو په زندانونو کې «شکنجې، ناوړه چلند او تاوتریخوالی» شته. د نوموړي په خبره؛ زوی یې اوس هم د طالبانو په زندان کې بندي دی او ۴۰ ورځې کېږي، چې له سختو شکنجو وروسته یې جبري اقرار ترې اخیستی.
نوموړي زیاته کړې: «دا رښتیا ده، په زندانونو کې شکنجې، ناوړه چلند او تاوتریخوالی شته». هغه له افغان سیاستوالو او مشرانو هم غوښتنه کړې، چې ژر تر ژره د خلکو د ژوند شرایطو د ښه کولو او په افغانستان کې د روانو کړاوونو د پای ته رسولو لپاره اقدام وکړي.
تر دې وړاندې د طالبانو ویاند ذبیحالله مجاهد له افغانستان انټرنشنل سره په یوه ځانګړې مرکه کې په زندانونو کې د بندیانو د شکنجې راپورونه په کلکه رد کړل او ویې ویل، چې د دوی د اصولو له مخې د تورنو کسانو هر ډول ځورونه منع ده.
