د برېتانوي ځواکونو پخوانی افغان همکار: د اسنادو له افشا کېدو وروسته د امنیت احساس نهلرم
یو افغان چې پخوا یې له برېتانوي ځواکونو سره کار کړی افغانستان انټرنشنل ته ویلي، چې د برېتانیا د دفاع وزارت له لوري د معلوماتو تر افشا کېدو وروسته هغه او د کورنۍ غړي یې په افغانستان کې له جدي امنیتي اندېښنو سره مخ شوي دي.
د هغه په وینا؛ داسې راپورونه او معلومات ترلاسه شوي، چې ښايي د دغه دوسیو اړوند کسان د طالبانو د استخباراتي او امنیتي ادارو له لوري وپېژندل شي او تر څار لاندې ونیول شي.
نوموړي زیاته کړې، چې دوی د امنیتي او اقتصادي وضعیت له مخې خورا ستونزمن حالت کې دی. هغه ادعا کړې، ځینې کسان د سیمې د نفوذ لرونکو کسانو په همکارۍ د هغه د موندلو په لټه کې دي چې له امله یې د دوی د کورنۍ اندېښنې نورې هم زیاتې شوې دي.
نوموړي له اړوندو مسوولینو او بنسټونو غوښتي، چې د هغه او د کورنۍ وضعیت ته یې پاملرنه وکړي او د دوی غږ تر پرېکړه نیوونکو بنسټونو ورسوي. دا په داسې حال کې ده، چې د برېتانیا د دفاع وزارت له لوري د افغان همکارانو د معلوماتو او اسنادو له افشا کېدو وروسته په افغانستان کې د دغه کسانو د امنیت او ژوند په اړه اندېښنې زیاتې شوې دي.
تر دې وړاندې هم د برېتانیا یوشمېر پخوانیو افغان همکارانو افغانستان انټرنشنل ته په استول شویو پیغامونو کې د خپل امنیت په اړه اندېښنه ښودلې وه او ویلي یې وو، چې د اسنادو افشا کېدل یې ژوند له جدي ګواښ سره مخ کړی دی.
بلخوا د برېتانیا دفاع وزارت ویلي، هغه زرګونه افغانان چې مخکې د برېتانیا د مېشتېدو او پناه ورکولو پروګرامونو لپاره منل شوي وو؛ اوس باید د طالبانو تر واک لاندې افغانستان نه د وتلو لارې چارې په خپله ومومي. د برېتانیا حکومت دغه پرېکړه له پراخو نیوکو سره هم مخ شوې ده.
