د عراق په زندانونو کې د یو شمېر افغان بندیانو کورنۍ وايي، عراقي پولیس د بندیانو د خوشې کولو په بدل کې ۴۰۰ تر ۶۰۰ ډالر غواړي. دوی د طالبانو پر بهرنیو چارو وزارت نیوکې کوي چې ددغو بندیانو د ستونزو په حل کې یې تر دې دمه همکاري نه ده کړې.
د ننګرهار یوه ځوان افغانستان انټرنشنل ته په خپل غږیز پیغام کې ویلي، چې ورور یې یو ځل له زندان څخه ورسره اړیکه نیولې او ورته یې ویلي چې د خوشې کېدو لپاره ترې ۶۰۰ ډالر غوښتل شوي دي.
د هغه په وینا، له پیغام سره یو بانکي حساب هم ورلېږل شوی او ورته ویل شوي چې که پیسې انتقال کړي، ورور به یې افغانستان ته ډیپورټ شي.
نوموړي زیاته کړه چې پیسې یې ورته ونه لیږلې او پر ځای یې په عراق کې د افغانستان له سفارت سره اړیکه نیولې، خو تر اوسه یې روښانه ځواب نه دی ترلاسه کړی.
هغه وویل: «سفارت هر ځل راته وایي چې نن او سبا به موضوع وڅېړي، خو تر اوسه کوم عملي اقدام نه دی شوی».
د دغه ځوان په وینا، پرون بیا هم له ورته شمېرې څخه پیغام ورلېږل شوی او ترې غوښتل شوي چې ۴۰۰ ډالر ورکړي څو د ورور د ډیپورټ چارې یې بشپړې شي. نوموړی وایي نه پوهېږي چې دغه پیسې د څه لپاره غوښتل کېږي او ایا دا یوه رسمي پروسه ده او که نه.
هغه ادعا کوي چې شاوخوا ۱۵ نور افغان ځوانان هم پېژني چې له ورته ستونزې سره مخ دي او د خپلو خپلوانو د خوشې کېدو یا ډیپورټ په نوم ترې د پیسو غوښتنې شوې دي.
دغه شکایتونه داسې مهال مطرح کېږي چې تر دې وړاندې هم په عراق کې مېشتو یو شمېر افغان مساپرو افغانستان انټرنشنل پښتو ته ویلي وو چې په وروستیو میاشتو کې ګڼ شمېر افغان ځوانان د کار موندنې لپاره عراق ته تللي، خو د قانوني اسنادو د نشتوالي له امله نیول شوي او زندانونو ته لېږدول شوي دي.
یو شمېر افغان بندیان او د هغوی خپلوان ادعا کوي چې زرګونه افغان کډوال په عراق کې د غیرقانوني استوګنې په تور نیول شوي او اوس مهال په بېلابېلو زندانونو کې ساتل کېږي.
د دوی په وینا، د زندانونو وضعیت د اندېښنې وړ دی او بندیان د خوراکي توکو، روغتیايي خدماتو او نورو لومړنیو اسانتیاوو له کمښت سره مخ دي. هغوی همدارنګه ادعا کوي چې له ځینو افغان بندیانو سره د نړیوالو انساني معیارونو خلاف چلند کېږي.
د بندیانو کورنۍ له طالب دیپلوماتیکو استازولیو او اړوندو ادارو غواړي چې د عراق په زندانونو کې د افغان بندیانو وضعیت وڅېړي او د هغوی د قانوني او بشري حقونو د خوندیتوب لپاره لازم اقدامات وکړي.
