په مسکو کې یو شمېر افغان ورزشکارانو د طالبانو له سفیر سره لیدلي دي
یو شمېر افغان ورزشکارانو په مسکو کې د طالبانو له سفیر ګل حسن حسن سره کتلي دي. دغه ورزشکاران د روسیې فدراسیون په کوربتوب د المپیکي مډال ګټونکو ځوانانو د تشویق په اتم نړیوال فورم کې د ګډون لپاره روسیې ته تللي.
د طالبانو سفیر ګل حسن حسن په دې کتنه کې له ورزشکارانو مننه وکړه چې په دغه نړیوال فورم کې یې د افغانستان استازیتوب وکړ. هغه وویل چې ورزش د ملتونو ترمنځ د نږدېوالي او په نړیواله کچه د هېواد د مثبت انځور د وړاندې کولو لپاره یوه مهمه او اغېزناکه وسیله ده.
سفیر هیله څرګنده کړه چې افغان ورزشکاران به د خپلو لاسته راوړنو له لارې د هېواد نوم لا روښانه کړي او په راتلونکو نړیوالو سیالیو کې به هم د افغانستان ښه استازیتوب وکړي. د غونډې په پای کې، په مسکو کې د طالبانو سفیر د ورزشکارانو د هڅو او لاسته راوړنو د ستاینې لپاره هغوی ته ستاینلیکونه او ډالۍ ورکړې.
د طالبانو د سپورټ د ادارې مشر احمدالله وثیق د دغه لیدنې په اړه په خپل اېکس پاڼه کې معلومات خپاره کړي او دا لیدنه یې د افغان لوبغاړو د روحیې د پیاوړتیا لپاره مهمه بللې ده.
احمدالله وثیق په مسکو کې د المپیکي مډال ګټونکو ځوانانو د تشویق په اتم نړیوال مجمع او فورم کې د ګډون په موخه د روسیې د چارواکو په رسمي بلنه دغه هېواد ته سفر کړی دی. دغه مجمع د ماشومانو د نړیوالې ورځې په مناسبت په مسکو کې جوړه شوې وه چې پکې د بېلابېلو هېوادونو استازو ګډون کړی و.
