د نرسنګ فارغانې د اګزیټ ازموینې د ځنډ له امله له نامعلوم برخلیک سره مخ دي
له کابل څخه یوه کس افغانستان انټرنشنل پښتو ته په رالېږلي پیغام کې ویلي چې خویندې یې د قابلګۍ له څانګې فارغې شوې دي، خو تر اوسه ترې د اګزیټ یا خروجي ازموینه نه ده اخیستل شوې. هغه وایي له اګزیټ ازموینې پرته یې خویندې په روغتون کې کار نه شي کولای.
دغه کس، چې نه غواړي نوم یې خپور شي، وایي چې د اګزیټ ازموېنې د نه اخیستل کېدو له امله د هغه خویندو ته اسناد نه دي ورکړل شوي.
د ده په وینا، د اسنادو له نشتوالي پرته د نرسنګ فارغانې نه شي کولای په دولتي ادارو کې دندې ترلاسه کړي او د ښځو د روغتیایي خدمتونو په برخه کې کار وکړي.
هغه ویلي، خویندې یې غواړي د شریعت له اصولو سره سم د هېواد د ښځو لپاره روغتیایي خدمتونه وړاندې کړي، خو د خروجي (اګزیټ) امتحان نه اخیستل د دوی د کار او اسنادو د بشپړېدو مخه نیولې ده.
دغه کس له طالبانو غوښتي چې د نرسنګ فارغانو ته د اګزیټ ازمیونې زمینه برابره کړي.
