خیبر پښتونخوا کې د سختو ورښتونو او تندر پرېوتو پېښو کې دوه کسان مړه او ۳۱ نور ټپیان شوي
د خیبر پښتونخوا ایالت په بېلابېلو سیمو کې د سختو بادونو، شړکنده بارانونو او تندر پرېوتو له امله په رامنځته شویو پېښو کې لږترلږه دوه کسان مړه او ۳۱ نور ټپیان شوي دي. د خیبر پښتونخوا د ناورینونو مدیریت ادارې د راپور له مخې؛ په ټپیانو کې اووه ښځې، ۱۶ نارینه او اته ماشومان شامل دي.
دغه پېښې د پېښور، چارسدې، نوشهره او بنو په ګډون د یاد ایالت په بېلابېلو ولسوالیو کې ثبت شوې دي. د ناورینونو مدیریت ادارې ویلي، چې د ولسوالیو اړونده ادارو ته یې لارښوونه کړې؛ څو اغېزمنو کورنیو ته بېړنۍ مرستې او د اړتیا وړ اسانتیاوې برابرې کړي.
یادې ادارې زیاته کړې، چې د ولسوالۍ ادارې، د ژغورنې ادارې او نورې اړونده ادارې د هر ډول احتمالي وضعیت د مقابلې لپاره چمتو دي او روان حالات له نږدې څاري. د یادې ادارې په وینا؛ په خیبر پښتونخوا کې د بارانونو او تېزو بادونو لړۍ به د جون تر پنځمې نېټې په وقفهیي ډول دوام وکړي.
